Hádegisfréttir

Hádegisfréttir 15. febrúar 2026

Nýr formaður framsóknarflokksins verður kjörinn á flokksþingi í dag. Baráttan stendur á milli Lilju Alfreðsdóttur og Ingibjargar Isaksen.

Forseti Finnlands segir Evrópu þurfa að sætta sig við að vera í þriðja sæti á forgangslista Bandaríkjastjórnar á alþjóðasviðinu. Ræða Marcos Rubio í gær sýni að sú afstaða hafi ekki breyst.

Rósin landsfélag jafnaðarfólks útilokar ekki framboð undir öðrum merkjum í borgarstjórnarkosningunum í vor. Félagið hefur slitið samstarfi við fulltrúaráð Samfylkingarinnar í Reykjavík.

Erlendur fjárfestir hefur keypt eignarhlut Íslendinga í Hótel Höfða Lodge sem á að rísa nærri Grenivík. Stefnt er að opnun í haust - fjórum árum seinna en til stóð.

Kjaradeilu Flugvirkjafélags Íslands og Icelandair hefur verið vísað til ríkissáttasemjara. Kjaraviðræður hófust í nóvember en hafa ekki skilað árangri.

Áratuga vinna við að hreinsa ána Don í Toronto í Kanada er byrjuð að skila árangri. Yfir 20 fisktegundir hafa sést í ánni sem lengi vel var þekkt fyrir mikla olíumengun.

Þær Elín Elmarsdóttir Van Pelt og Sonja Lí Kristinsdóttir keppa í stórsvigi á Vetrarólympíuleikunum í dag. Elín er í 49. sæti eftir fyrri ferðina, Sonja í því 53.

Birt

15. feb. 2026

Aðgengilegt til

Rennur ekki út

Útvarpsfréttir.