Almannavarnir fara nú yfir sviðið með þeim sem koma að málefnum Grindavíkur, til að meta þar áhættu fyrir íbúa og fyrirtæki. Ekki liggur fyrir hvaða ráðleggingar almannavarnir gefa.
Landspítali vinnur að undirbúningi á flutningi aldraðra einstaklinga frá spítalanum á sjúkrastofnanir víðs vegar um landið. Rúmlega hundrað einstaklingar með gilt færni- og heilsumat eru í biðstöðu á spítalanum.
Bandaríkin gerðu árás á bækistöðvar Húta í Jemen í nótt, aðra nóttina í röð. Sameinuðu þjóðirnar skora á alla að koma í veg fyrir að átökin í Miðausturlöndum verði enn harðari og útbreiddari.
Þingmaður Sjálfstæðisflokksins telur einsýnt að matvælaráðherra hafi skapað ríkinu skaðabótaskyldu með hvalveiðibanni. Hann segir að þingflokkur Vinstri grænna þurfi að bregðast við álitinu.
Lai Ching-te varaforseti Taívan verður næsti forseti landsins ef marka má bráðabirgðaniðurstöður kosninganna þar. Hann vill þróa landið áfram í lýðræðisátt.
Jökulhlaup úr Grímsvötnum nær líklega hámarki um helgina. Engin merki eru um gosóróa.
Stórvarasöm hálka er víða á vegum og gangstígum í dag. Vegagerðin beinir því til ökumanna og gangandi vegfaranda að fara með gát.
Snorri Steinn Guðjónsson, landsliðþjálfari íslands í handbolta segir að leikmenn liðsins þurfi að líta í eigin barm fyrir leikinn gegn Svartfellingum á morgun. Ísland gerði jafntefli við Serbíu í gærkvöldi.
