Umsátursástand ríkir á Gaza-ströndinni og Ísraelsmenn hafa lokað fyrir vatn og rafmagn til íbúa. Ísraelsher skaut mörg hundruð flugskeytum á Gaza í nótt. Rúmlega tólf hundruð hafa fallið í árásum síðan á laugardag og þúsundir særst.
Stór hópur Íslendinga sem var á ferðalagi í Ísrael er kominn til Jórdaníu, þaðan verður flogið til Íslands í kvöld. Fararstjóri segir fólki mjög létt.
Yfir tvö þúsund fórust í jarðskjálftanum sem reið yfir vesturhluta Afganistan á laugardag. Margra er enn saknað. Björgunarsveitir og aðrir sjálfboðaliðar leita áfram að fólki í húsarústum.
Aðalmeðferð í máli manns sem ákærður er fyrir að hafa stungið meðleigjanda sinn til bana í Drangahrauni í Hafnarfirði í júní, hófst í morgun. Maðurinn ber fyrir sig sjálfsvörn og segir hinn látna hafa reynt að kúga af sér fé.
Gular viðvaranir eru í gildi um suðvesturland vegna úrhellisrigninga og í nótt verða þær appelsínugular á Norðurlandi og gular annars staðar á landinu. Veðurstofan varar við aukinni skriðuhættu á Suður-, Vestur- og Norðurlandi.
Matvælastofnun eignast brátt eigin báta og getur mætt óvænt í eftirlit í fiskeldisstöðvar. Starfsmönnum MAST sem sinna fiskeldi verður líka fjölgað.
Flokkarnir sem skipa þýsku ríkisstjórnina biðu afhroð í kosningum tveimur sambandslöndum í gær. Þýski þjóðernisflokkurinn, AfD, náði bestu niðurstöðu sinni til þessa í kosningum í vesturhluta Þýskalands.
Hátt í sextíu prósent foreldra sem deila forsjá, upplifa mismunun vegna þess að þau deila ekki lögheimili með barni sínu. Formaður Foreldrajafnréttis segir meðlagsgreiðslukerfið úrelt og það þurfi að endurskoða.
