Landsbjörg hefur óskað eftir aðstoð frá björgunarsveitum á landsbyggðinni til að létta álagi af sveitunum sem hafa staðið vaktina á Reykjanesskaga. Um ellefu hundruð björgunarsveitarmenn hafa verið að störfum undanfarna ellefu daga. Skýr merki eru um landris í Svartsengi.
Safnskólar verða á fjórum stöðum í Reykjavík fyrir grunnskólabörn frá Grindavík. Búið er að finna húsnæði fyrir leikskólabörn en enn á eftir að finna starfsfólk.
Ísraelsher hefur umkringt fleiri sjúkrahús á Gaza í leit að höfuðstöðvum Hamas-samtakanna. Viðræðum um vopnahlé miðar vel. Stjórnvöld í Katar segja styttast í samkomulag sem feli í sér að gíslum í haldi Hamas verði sleppt.
Frjálshyggjumaðurinn Javier Milei verður næsti forseti Argentínu. Hann boðar breytta tíma og endurreisn í efnahagsmálum sem eru í kaldakoli, verðbólga þar nálgast 150%.
Engin rækja verður veidd í Ísafjarðardjúpi og aðeins 166 tonn í Arnarfirði ef farið verður að ráðgjöf Hafrannsóknarstofnunar. Forsvarsmaður rækjuvinnslu á Vestfjörðum vonar að ráðgjöfin verði endurskoðuð í febrúar.
Sam Altman, sem var rekinn úr forstjórastóli gervigreindarfyrirtækisins Open AI, á föstudag hefur verið ráðinn til Microsoft. Uppsögnin olli umróti þar sem lykilhópur starfsmanna fylgir Altman.
Stofn íslensku sumargotssíldarinnar er á hraðri uppleið eftir mörg mögur ár. Ekki er hægt að rannsaka stofninn sem skyldi vegna niðurskurðar.
Í kvöld ræðst hvort karlalandslið Íslands í fótbolta kemst í umspil um laust sæti á lokakeppni Evrópumótsins á næsta ári. Liðið tapaði 2-0 fyrir Por túgal í gær.
