Hádegisfréttir

Hádegisfréttir 17. febrúar 2024

Ríflega hundrað hafa verið handteknir í Rússlandi fyrir þátttöku í mótmælum vegan andláts Alexei Navalní, helsta stjórnarandstæðings landsins, sem lést í gær. Talsmaður hans hefur staðfest andlátið og fjölskyldan krefst þess að fá lík hans afhent.

Starfsfólk HS veitna vinnur nú að því að grafa í gegnum hraun janúareldgossins til að komast að leka í hitaveitulögn til Grindavíkur. Um helmingur vatnsins sem er sent um hana tapast á leið í bæinn og erfitt að halda hita á sumum húsum.

Framvegis þurfa fiskeldisfyrirtæki að sækja um byggingarleyfi fyrir sjókvíum hjá Húsnæðis- og mannvirkjastofnun. Hingað til hefur aðeins þurft að sækja um rekstrar- og starfsleyfi.

Bóndi í Borgarbyggð þarf líklega að hella niður á annað hundrað lítrum af mjólk eftir sólarhrings rafmagnsleysi.

Donald Trump, fyrrverandi Bandaríkjaforseti, þarf að greiða fimmtíu milljarða króna sekt vegna bókhaldssvika og má ekki stunda viðskipti í New York næstu þrjú árin.

Heitt loft að sunnan hrekur kalda loftið norður eftir landinu og út á sjó. Í morgun hefur mælst tíu stiga hiti og fjórtán stiga frost samtímis.

Bikarúrslitin í blaki verða spiluð í Digranesi í dag. Í kvennaflokki mætast KA og Afturelding og í karlaflokki Þróttur Fjarðabyggð og Hamar.

Frumflutt

17. feb. 2024

Aðgengilegt til

Rennur ekki út

Útvarpsfréttir.