Eldgos hófst á milli Hagafells og Stóra Skógfells í gærkvöldi eftir skammvinna skjálftavirkni. Nú gýs á þremur stöðum en töluvert hefur dregið úr virkni og gosrennsli. Eldgosið er það fjórða á Reykjanesskaga á jafnmörgum mánuðum.
Hraun rennur hægt og hefur safnast saman í tjarnir við varnargarða við Grindavík. Þær gætu skyndilega brostið, en hraun er nú þegar farið að flæða á litlum hraða úr tjörnunum í átt að Suðurstrandarvegi og sjó. Nái það í sjó er hætta á klórgufum og sprengingum.
Hraun flæddi yfir Grindavíkurveg í nótt og Suðurstrandarvegi hefur verið lokað. Þá hefur orðið vart við sig við Nesveg. Raunhæfur möguleiki er á að allar leiðir til Grindavíkur lokist, segir Viðir Reynisson, yfirlögregluþjónn almannavarnadeildar ríkislögreglustjóra. Öllum viðbragsðaðilum verður komið út úr bænum um neyðarleið, ef þörf krefur.
Nú stefnir flæðið rólega í átt að bænum Hrauni við Grindavík. Ábúandi þar segist óttast að það nái bænum að lokum. Hann fékk leyfi til að fara heim í gær til að bjarga verðmætum.
Vel gekk að rýma Grindavík og Bláa lónið þegar gosið hófst í gærkvöldi. Íbúi í Grindavík segir að aðdragandinn hafi verið enginn.
Hátt settir meðlimir skuggaráðuneytis Keirs Starmer, leiðtoga Verkamannaflokksins, hafa fundað með reynsluboltum úr flokknum að undanförnu. Tilgangurinn er að undirbúa þá fyrir ráðherraembætti.
Óvissustigi vegna snjóflóðahættu hefur verið lýst yfir á norðanverðum Vestfjörðum. Ekki er talin hætta í byggð að svo stöddu.
Fólki er bent á að sýna varkárni og fylgjast með veðurspám.
Halla Tómasdóttir býður sig fram til embættis Forseta Íslands. Hún tilkynnti um framboð sitt á blaðamannafundi í hádeginu.
