Ríkisstjórnin hefur til skoðunar hvort takmarka eigi launahækkun æðstu ráðamanna um næstu mánaðamót. Bjarni Benediktsson fjármálaráðherra kveðst mótfallinn því að vera sífellt að krukka í launum æðstu embættismanna ríkisins. Launin séu þó til skoðunar vegna þeirrar kröfu verkalýðshreyfingarinnar, að þingmenn og ráðherrar sýni ábyrgð.
Fernur hér á landi eru brenndar í sementsverksmiðjum á meginlandi Evrópu - ekki endurunnar eins og haldið hefur verið fram. Sorpa segir umbúðir utan um mjólk og safa í raun dauðadæmdar til endurvinnslu.
Faðir stúlku sem var beitt kynferðislegu ofbeldi í sumarbúðum fyrir fatlaðra, fagnar skýrslu sem staðfestir að starfsfólk hafi brugðist með því að spilla vettvangi og senda geranda af vettvangi.
Fólk vill fara að mæta aftur til vinnu og það styttist í markið segir Sonja Ýr Þorbergsdóttir, um kjaradeilu BSRB og sveitarfélaganna.
Hlutabréf hækkuðu á mörkuðum vestanhafs í morgun eftir að báðar deildir Bandaríkjaþings samþykktu hækkun á skuldaþaki í gærkvöldi.
Rússar saka Úkraínumenn um að hafa skotið á bíl í Belgorod-héraði þar sem tvær létust og tveir særðust alvarlega. Utanríkisráðherra Bandaríkjanna segir að hundrað þúsund Rússar hafi fallið á síðustu sex mánuðum.
Vegagerðin hefur til skoðunar að koma fyrir rörum undir veginum yfir Hellisheiði til að veita gufu undan honum. Jarðhitinn hefur hækkað síðustu vikur.
Ekkert lát er á hitabylgjunni á Austurlandi og hiti fór yfir tuttugu stig í morgun. Íslendingar eru ekki farnir að hópast á tjaldstæðin en erlendir ferðamenn stoppa lengur og njóta blíðunnar.