Dæmi eru um að mánaðarlegar afborganir af óverðtryggðu húsnæðisláni --hafi hækkað um á annað hundrað þúsund krónur á einu ári. Talsmaður Hagsmunasamtaka heimilanna segir að vandinn eigi eftir að aukast.
Hjúkrunarfræðingur, sem er ákærður fyrir að hafa orðið sjúklingi að bana á geðdeild Landspítala, hafði unnið nítján vaktir á sextán dögum. Forstjóri spítalans segir að aðstæður starfsfólks á deildinni hafi verið ófullnægjandi.
Tveir fórust og tuttugu og þrír særðust, þar af tvö börn, í árás á spítala í borginni Dnipro í Úkraínu í nótt. Rússlandsher gerði árásir víða.
Búast má við að krabbameinstilvikum fjölgi um rúmlega fimmtíu prósent til ársins 2040. Framkvæmdastjóri Krabbameinsfélagsins segir nauðsynlegt að bregðast við.
Veðurstofan hefur gefið út gula viðvörun um mestallt land sem tekur gildi í kvöld. Mjög hvasst getur orðið á morgun.
Næstum 150 manns fengu ekki SMS-skilaboð Almannavarna í prófun sem gerð var í Neskaupstað á miðvikudag. Þetta er næstum því tíundi hver farsími í bænum.
Tvenn jarðgöng, undir Mikladal og Hálfdán, eru helsta krafan við undirbúning sameiningar Tálknafjarðarhrepps og Vesturbyggðar. Sveitarstjórinn á Tálknafirði segir að vegakerfið á sunnanverðum Vestfjörðum sé ónýtt.
Fimmtíu og fimm ár eru síðan Íslendingar skiptu yfir í hægri umferð. H-dagurinn svokallaði var undirbúinn af mikilli kostgæfni.
Mikil eftirvænting er í Vestmannaeyjum. Eyjamenn geta tryggt sér Íslandsmeistaratitil karla í handbolta í kvöld.
