Mikið hefur verið um tilraunir til netárása á íslenska innviði síðustu daga, í aðdraganda leiðtogafundar Evrópuráðsins. Forstjóri netöryggissveitarinnar CERT-ÍS segir engin alvarleg atvik hafa komið upp, en hann býst við auknum þunga þegar fundurinn hefst á morgun.
Um þúsund félagsmenn BSRB í leik- og grunnskólum fjögurra bæjarfélaga leggja niður störf í dag. Formaður BSRB segir félagsmenn undirbúa frekari verkfallsaðgerðir því samningaviðræður hafi litlu sem engu skilað.
Allt útlit er fyrir að kjósa þurfi að nýju eftir hálfan mánuð um tvo helstu frambjóðendur til forseta í Tyrklandi. Erdogan forseti fékk heldur meira fylgi en andstæðingur hans í forsetakosningunum í gær, en náði ekki helmingi atkvæða.
Bændur í Miðfirði segjast ekki geta orðið við því að senda þrjátíu kindur til slátrunar í vikunni að beiðni MAST. Einn þeirra segir tímabært að stofnunin ræði við bændur í stað þess að setja þeim afarkosti.
Ökumenn á sumardekkjum lentu í vandræðum í vetrarfærð á Fjarðarheiði í gærkvöld. Engan sakaði þegar árekstur varð og yfirgefinn húsbíll fauk út af veginum. Hálka og krapi er á nokkrum fjallvegum á Norður- og Austurlandi.
Áform fjármálaráðherra um að slíta ÍL-sjóði eru gagnrýnd harðlega í samráðsgátt stjórnvalda og talið að það leiði ágreinings og óvissu. Átta umsagnir bárust og eru þær allar neikvæðar.
Formaður Geðhjálpar vill að hlustað sé betur á notendur geðþjónustu í heilbrigðisgeiranum. Fólk sem er með geðrænan vanda og þarf aðstoð, þarf að fá að taka ríkari þátt í því að móta þjónustuna.
