Björgunarsveitir komu tveimur ferðamönnum til aðstoðar nálægt gosinu á Reykjanesskaga í nótt. Lögreglustjórinn á Suðurnesjum er vongóður um að hægt verði að hleypa fólki að gosstöðunum í dag.
Samningur um útflutning á úkraínsku korni er úr sögunni, segja stjórnvöld í Kreml, nema kröfur Rússa verði uppfylltar. Tveir létust í árás á rússnesku Krímskagabrúna í morgun.
Spáð er ofsahita víða í Evrópu og Norður- Ameríku á næstu dögum og eru rauðar veðurviðvaranir í gildi í mörgum löndum. Íslendingur í Róm hefur snúið sólarhringnum við og athafnar sig á næturnar, sem þó eru mjög heitar.
Stefnt er á að innan þriggja ára verði öll skemmtiferðaskip sem leggjast að bryggju í Reykjavík tengd við rafmagn.
Rjúpnatalningar í vor sýndu litlar breytingar á stofnstærð rjúpunnar frá í fyrra. Enn er óljóst hvaða áhrif kuldahret í sumar hafði á viðkomu rjúpunnar og þá um leið á stærð veiðistofnsins í haust.
Ástralskan sjómann rak stefnulaust um Kyrrahafið í tvo mánuði áður en honum var bjargað í gær. Félagsskapur sem maðurinn hafði af hundi sínum er talinn hafa bjargað lífi hans.
Hákon Arnar Haraldsson, landsliðsmaður í fótbolta, er á leið til franska úrvalsdeildarliðsins Lille frá FC Kaupmannahöfn. Söluverðið er sagt vera rúmlega tveir og hálfur milljarður íslenskra króna.