Forstjóri Landsvirkjunar segir stórnotendur eins og álfyrirtækin ekki hafa ljáð máls á að kaupa upprunaábyrgðir fyrir grænni orku - í samningagerð við Landsvirkjun. Hann telur bann við útflutningi á upprunaábyrgðum héðan fela í sér mismunun og væntir þess að úr greiðist.
Bretar ætla að senda Úkraínumönnum langdrægar flaugar og Úkraínuher þokast aðeins áfram í sókn sinni gegn Rússum í Bakhmut.
Stór hópur skólabarna féll um fimm metra þegar göngubrú á byggingarsvæði hrundi í Finnlandi í morgun. Henni hafði verið lýst sem hættulegri um nokkra hríð.
Héraðsdýralæknir segir mikilvægt að bændur í Miðfirði afhendi Matvælastofnun fé sem komi af bænum Syðri-Urriðaá áður en því verði hleypt á fjöll. Annars geti ráðherra gefið út fyrirskipun um afhendingu gripanna.
Aukinn viðbúnaður er við landamæri Bandaríkjanna og Mexíkó þar sem þúsundir freista þess að komast yfir á miðnætti -- þegar hert lög vegna covid-faraldursins falla úr gildi.
Diljá segir mikilvægt að ofæfa ekki atriðið sem hún flytur í Eurovision í kvöld. Við verðum í beinni frá Liverpool í fréttatímanum.
ÍBV komst í gærkvöld í úrslit í úrvalsdeild karla í handbolta. Oddaleik þarf hins vegar til að útkljá Íslandsmót kvenna í blaki eftir háspennusigur Aftureldingar á KA í gærkvöldi.