Ólíklegt er að markmið stjórnvalda um stórfellda íbúðauppbyggingu næsta áratuginn náist, að mati ASÍ. Grípi stjórnvöld ekki inn í kemur það verst niður á þeim sem eru á leigumarkaði.
Samfélagið allt þarf að bregðast við auknu ofbeldi í grunnskólum, að mati formanns Kennarasambands Íslands. Borgarfulltrúi segir foreldra úrkula vonar vegna langra biðlista.
Verkföll BSRB koma fram af fullum þunga í þessari viku - í leik- og grunnskólum víða á höfuðborgarsvæðinu. Ömmur og afar hafa hlaupið undir bagga en viðbúið að margir þurfi að nota orlofsdaga til að bregðast við vandanum.
Kjarnorkuverið í Zaporizhzhia í Úkraínu var aftengt raforkukerfinu í nokkrar klukkustundir vegna sprengjuárása á raflínur og fékk orku frá díselrafstöð. Kjarnorkumálastjóri Sameinuðu þjóðanna segir öryggismál í verinu brothætt.
Spáð er sumarhita Austanlands á morgun en hagl- og slydduéljum syðra. Gular viðvaranir verða á stórum hluta landsins vegna suðvestan hvassviðris.
Fyrirhugaður ellefti pakki refsiaðgerða Evrópusambandsins gegn Rússum fær misgóðar viðtökur hjá aðildarríkjum sambandsins. Utanríkisráðherrar ESB ræða þessar aðgerðir á fundi í Brussel.
Þau sem pantað áttu á flug með Niceair geta enn beint kröfum sínum til fyrirtækis sem bar ábyrgð á flugrekstrinum, þrátt fyrir að Niceair hafi óskað eftir gjaldþrotaskiptum. Fyrirtækið getur þó neitað að endurgreiða farmiða.
Ný gervigreindarlíkön eru betri í að gera veðurspár en hefðbundin veðurlíkön. Hópstjóri á Veðurstofunni segir þetta stórt framfaraskref.
