Eldgos gæti hafist á Reykjanesskaga á næstu dögum í kjölfar landriss og sterkrar skjálftahrinu undanfarið, segir prófessor í jarðeðlisfræði. Ef af verður er líklegt að það verði enn fjær mannabyggð en eldgos síðustu tveggja ára, það er að segja norður af þeim gosstöðvum og í átt að Keili.
Ferðamenn sem voru að leggja upp í göngu á Fagradalsfjall voru grunlausir um að eldgos kynni að vera yfirvofandi. Sumir snarhættu við eftir varnaðarorð fréttamanns, aðrir hugðust halda sínu striki.
Rússar og Úkraínumenn vara við yfirvofandi árás á kjarnorkuverið í Zaporizhzhia í Úkraínu. Forseti Úkraínu segir Rússa hafa komið fyrir búnaði sem líkist sprengiefni við kjarnorkuverið.
Framkvæmdastjóri Creditinfo segir að of mikið traust fyrirtækisins til smálánafyrirtækja hafi leitt til þess að fjöldi fólks fór á vanskilaskrá án þess að skilyrði til þess hafi verið uppfyllt. Hún segir að bótaréttur fólksins verði skoðaður.
Mikil eyðilegging blasir við í flóttamannabúðum í Jenin í Palestínu þar sem Ísraelsher hefur gert árásir í tvo sólarhringa. Hernaðaraðgerðunum er lokið.
Alvarlegar athugasemdir eru gerðar við réttarríkið í Póllandi í árlegri skýrslu Evrópusambandsins um réttarfar í aðildarríkjum bandalagsins. Staða fjölmiðla í Póllandi, sem og í Ungverjalandi, er einnig áhyggjuefni, segir í skýrslunni.
Búist er við tíu þúsund manns til Akureyrar um helgina á drengjamót í fótbolta sem hófst á hádegi. Hætt er við að börnum og foreldrum verði kalt í dag í norðanátt og sex stiga hita.
