Formaður leigjendasamtakanna lýsir yfir vonbrigðum með tillögur starfshóps innviðaráðherra um bætta stöðu leigjenda.
Tillögurnar stuðli að hærra leiguverði og verri stöðu fólks á leigumarkaði. Ekki eru lagðar fram hugmyndir um leiguþak.
Íbúðaverð á höfuðborgarsvæðinu hefur lækkað um sex prósent að raunvirði síðasta árið. Viðlíka lækkun hefur ekki sést frá tvöþúsund og tíu.
Leiðin að gosstöðvunum á Reykjanesskaga var opnuð á ný í morgun. Þá var einnig opnuð styttri leið frá Vigdísarvöllum. Engin gæsla verður á þeirri leið og lögreglan mælir ekki með henni.
Hundruð réðust inn í sænska sendiráðið í Írak í nótt og kveiktu elda. Stjórnvöld í Írak ætla að slíta stjórnmálasambandi við Svíþjóð ef kóranbrennur verða áfram leyfðar í mótmælaskyni. Ein slík mótmæli hófust í Stokkhólmi fyrir klukkustund.
Landeigendur sem ekki stunda búskap eru víða þreyttir á ágangi fjár. Breyttir samfélagshættir í sveitum landsins eru áskorun, að sögn framkvæmdastjóra Sambands íslenskra sveitarfélaga.
Tveir létust í skotárás í nýsjálensku borginni Auckland í morgun, þar sem HM kvenna í knattspyrnu er nýhafið.