Kvika er talin vera á um eins kílómetra dýpi á Reykjanesskaga. Ef hún brýtur sér leið upp á yfirborðið er búist við kröftugra gosi en síðustu tvö ár
Íslenska frumkvöðla- og nýsköpunarfyrirtækið Kerecis hefur verið selt danska fyrirtækinu Coloplast fyrir tæpa 180 milljarða íslenskra króna. Forstjóri Keresic segir að starfsemi þess á Ísafirði verði efld.
Þingmenn stjórnarandstöðunnar segja efni greinargerðar setts ríkisendurskoðanda um Lindarhvol sláandi. Viðmiðum um gagnsæi og upplýsingagjöf hafi ekki verið fylgt -- og verðmat ráðuneytis hafi verið of lágt.
Mikill hiti er í strandveiðisjómönnum eftir ákvörðun matvælaráðherra í gær að bæta ekki við veiðiheimildum. Strandveiðikvótinn klárast að óbreyttu í næstu viku.
Volodymyr Zelensky, forseti Úkraínu, mætir á leiðtogafund Atlantshafsbandalagsins í Vilnius í næstu viku. Þetta staðfesti Jens Stoltenberg, framkvæmdastjóri NATO, á blaðamannafundi í Brussel skömmu fyrir fréttir. Búist er við að leiðtogar aðildarríkjanna samþykki yfirlýsingu um inngöngu Úkraínu í NATO.
Veðurhorfur: Norðaustan þrír til tíu metrar í dag, en átta til fimmtán suðaustan til. Víða léttskýjað á vestanverðu landinu, annars skýjað og fer að rigna á Suðaustur- og Austurlandi í kvöld. Hiti tólf til tuttugu stig, hlýjast sunnanlands, en svalara fyrir austan. Suðlæg eða breytileg átt þrír til tíu á morgun. Bjart veður norðan heiða, en skýjað með köflum og syðra og dálítil væta suðaustanlands. Hiti fjórtán til tuttugu og tvö stig.