Virkni eldgossins við Litla-Hrút er svipuð og í gær. Fólksfjöldi er við gosstöðvarnar, mikinn reyk leggur frá gosinu og frá gróðureldum við hraunbrúnina. Lungnalæknir segir hætt við reykeitrun.
Sjö fengu aðstoð björgunarsveita við gosstöðvarnar í nótt. Lögreglan segir að umferð sé mikil og kvartar yfir að ökumenn leggi bílum sínum á Suðurstrandarvegi í stað sérmerktra bílastæða.
Niðurstaða leiðtogafundar Atlantshafsbandalagsins varðandi Úkraínu er varða á leiðinni til fullrar aðildar, segir Þórdís Kolbrún Gylfadóttir utanríkisráðherra. Forseti Úkrainu segir að óskandi hefði verið að fá formlegt boð um aðild.
Strandveiðar stöðvast frá og með deginum í dag. Þeim hefur aldrei lokið jafn snemma. Formaður Landssambands smábátaeigenda segir ástandið slæmt.
Innan við þrjátíu metangasbílar hafa verið nýskráðir á síðustu tveimur árum. Framkvæmdastjóri Félags íslenskra bifreiðaeigenda segir notkun metangass minnka hratt.
Fransk-tékkneski verðlaunarithöfundurinn Milan Kundera er látinn. Merkur rithöfundur en hlýr maður, sem fór sínar eigin leiðir, segir vinur hans, sem þýddi verk hans á íslensku.