Síðdegisútvarpið

Ný tegund uppgötvuð á Íslandi, blikur á lofti í ferðamannaiðnaði og golfbíl stolið af frægri vinstri skyttu

Geðhjálp er orðinn aðili að Umhyggju, félagi langveikra barna. Árný Ingvarsdóttir, framkvæmdastjóri Umhyggju kemur til okkar og útskýrir hvað sú aðild getur þýtt fyrir félaga í Geðhjálp en kynningarfundur verður haldinn á fimmtudaginn um málið.

Líkur eru á því að eldgos komi upp undir sjó nærri Eldey á Reykjanesinu. Freysteinn Sigmundsson jarðfræðingur ræðir um stöðuna á Reykjanesinu.

Leikfélagið á Dalvík hefur óskað eftir því við bæjaryfirvöld að minnisvarði verði reistur um tökur á þáttunum True Detective: Nightcountry sem eru sýndir á Max/HBO sjónvarpsstöðinni. Friðjón Árni Sigurvinsson lék í þáttunum og er upplýsingafulltrúi Dalvíkurbyggðar. Hann ætlar að segja okkur frá því hvernig var að leika í þáttunum, og þýðingu þeirra fyrir sveitafélagið.

Kolkrabbi hefur bæst í flóru sjávardýra á Íslandi, en nýr kolkrabbi var uppgötvaður í upphafi síðasta áratugar og er nú staðfest að þessi örlitli kolkrabbi er alíslenskur og hefur verið nefndur Ægir í höfuðið á jötninum sjálfum. Þau Steinunn Hilma Ólafsdóttir, sjávarlíffræðingur hjá Hafrannsóknastofnun og Guðmundur Guðmundsson, flokkunarfræðingur hjá Náttúrufræðistofnun, koma til okkar og ræða þennan merka fund.

Vinstri skyttan og mögulega höggþyngsti maður Íslandssögunnar, Sigurður Sveinsson, varð fyrir því óláni að óprúttnir aðilar stálu fagurrauðum bensínknúnum golfbíl af heimili hans. Siggi Sveins gaf þjófunum færi á að skila bílnum, ella myndi hann elta þá uppi eins og Liam Neeson í alræmdri spennumynd, og tjarga þá og fiðra. Það er hollt fyrir þessa menn að muna að hér fer ein hraustasta handboltakempa íþróttasögunnar.

Flugfélagið play er með vilyrði fyrir hlutafjáraukningu upp á tveir komma sex milljarða króna. Markmiðið er fyrst og fremst að styrkja lausafjárstöðu félagsins. Það gætir á óróleika í ferðaiðnaðinum meðal annars tengdum jarðhræringum á Reykjanesi sem höfðu neikvæð áhrif á eftirspurn og verkfall flugumferðarstjóra. Ofan á allt annað hefur hlutabréfaverð Icelandair lækkað um meira en 9% í ár og hefur ekki verið lægra síðan árið 2020.

Frumflutt

20. feb. 2024

Aðgengilegt til

19. feb. 2025

Þegar fyrsta hluta úthlutunar leikskólaplássa í Reykjavík lauk föstudaginn 10. maí höfðu foreldrar rúmlega 1700 barna fengið boð og þegið vistun í borgarrekna leikskóla.

Hildur Lilja Jónsdóttir, fagstjóri leikskóla í Austurmiðstöð sem einnig er í innritunarteymi skóla- og frístundasviðs kemur til okkar á eftir og fer yfir stöðuna í þessum málaflokki með okkur.

Halla Hrund Logadóttir forsetaframbjóðandi verður síðan hjá okkur í seinni hluta þáttar á grillinu eins og við höfum kosið að kalla þennan dagskrárlið. Við spyrjum Höllu spjörunum úr og freistum þess að kynnast henni betur.

Alþjóðaheilbrigðismálastofnunin WHO telur að akstur vegna farsímanotkunar sé einn stærsti áhættuþáttur umferðarslysa í heiminum.

Allt bendir til þess að fólk sem notar síma við akstur sé fjórum sinnum líklegra til að lenda í slysi. Þá er tuttugu og þrisvar sinnum líklegra að fólk sem les og eða skrifar skilaboð meðan á akstri lendi í slysi. Nú hefur Samgöngustofa í samvinnu við tryggingarfélagið Sjóvá ákveðið að hrinda af stað herferð gegn farsímanotkun sem ber yfirskriftina "EKKI TAKA SKJÁÁHÆTTUNA" Það er hættulegt að tala í síma undir stýri. Gunnar Geir Gunnarsson deildarstjóri öryggis- og fræðsludeildar Samgöngustofu kemur til okkar.

Íbúar í Ölfusi eru að fara að kjósa samhliða forsetakosninunum um hvort þeir vilji breyti á deiluskipulagi þannig að mölunarverskmiðja Hedelberg geti risið í næsta nágrenni við Þorlákshöfn. Það er búið að boða til íbúðarfundar í kvöld og hingað er komin Ása Berglind Hjálmarsdóttir bæjarfulltrúi í minnihluta bæjarstjórnar Ölfuss.