Síðdegisútvarpið

2.nóvember

Óánægju hefur gætt meðal foreldra leikskólabarna í Árborg vegna mögulegrar yfirtöku Hjallastefnunnar á leikskólanum Árbæ en tilkynning barst í enda októbermánaðar að skólinn yrði Hjallastefnuleikskóli frá og með 2. nóvember. Framkvæmdastjóri Hjallastefnunnar er Bóas Hallgrímsson og hann segir okkur nánar frá upplýsingaskorti sem varð úr og leiðréttur var.

Rithöfundurinn Eiríkur Örn Norðdahl gaf út á dögunum bókina Náttúrulögmálin og fagnaði útgáfunni í kjölfarið með hófi á Byggðasafni Vestfjarða á Ísafirði en Eiríkur er búsettur fyrir vestan. Hann lét það sér þó ekki nægja heldur rauk af stað í heilmikla upplestrarferð þar sem 32 áfangastaðir verða á leið hans í hringferðinni. Við heyrum í Eiríki sem tapaði hattinum sínum í ferðinni.

Hljómsveitin Bítlarnir voru að ?droppa? nýju lagi, svo við notum tungutak nútíma tónlistarfólks en flest talar það um að droppa þegar nýtt lag ratar á streymisveitur. Þetta væri ekki í frásögur færandi ef Bítlarnir hefðu ekki hætt fyrir vel rúmum 50 árum síðan. Með hjálp gervigreindar má í laginu heyra samspil allra meðlima þó tveir þeirra séu látnir. Árni Matthíasson spjallar lítillega við okkur um nýja lagið og hvað gervigreindin geti fært okkur í framtíðinni.

Niðurstöður nýrrar rannsóknar, sem nær til um 65 þúsunda fullorðinna einstaklinga á Íslandi, Svíþjóð, Danmörku og Noregi, benda til þess að alvarleiki veikinda af völdum COVID-19-sjúkdómsins sé ákvarðandi þáttur um hættuna á langvarandi líkamlegum einkennum þeirra sem sýkjast. Rannsóknin var unnin innan COVIDMENT-rannsóknarstarfsins og niðurstöðurnar birtust í dag í vísindatímaritinu The Lancet Regional Health - Europe. Thor Aspelund, prófessor við Miðstöð í lýðheilsuvísindum við Háskóla Íslands er einn þeirra sem kemur að þessari rannsókn. Hann kemur til okkar á eftir.

Lús í laxeldi Arctic Fish í Tálknafirði fjölgaði mikið í október og samkvæmt nýjum fréttum af ruv.is segir sérgreinalæknir hjá MAST að jafnmikla lús hafi ekki áður sést hér á landi. Veiga Grétarsdóttir, kajakræðari og náttúruverndarsinni var í Tálknafirði í lok síðustu viku og tók upp myndbönd af deyjandi löxum og förgun sem á sér stað hjá Arctic Fish. Veiga segir okkur frá því sem fyrir augum bar.

Loks kemur til okkar að venju, Atli Fannar Bjarkason, með miðvikudags-meme-ið og spennandi að sjá hvað kemur upp úr þeim hatti í dag.

Það eru Hrafnhildur og Kristján Freyr Halldórsbörn sem stýra þætti kvöldsins.

Frumflutt

2. nóv. 2023

Aðgengilegt til

1. nóv. 2024

Þegar fyrsta hluta úthlutunar leikskólaplássa í Reykjavík lauk föstudaginn 10. maí höfðu foreldrar rúmlega 1700 barna fengið boð og þegið vistun í borgarrekna leikskóla.

Hildur Lilja Jónsdóttir, fagstjóri leikskóla í Austurmiðstöð sem einnig er í innritunarteymi skóla- og frístundasviðs kemur til okkar á eftir og fer yfir stöðuna í þessum málaflokki með okkur.

Halla Hrund Logadóttir forsetaframbjóðandi verður síðan hjá okkur í seinni hluta þáttar á grillinu eins og við höfum kosið að kalla þennan dagskrárlið. Við spyrjum Höllu spjörunum úr og freistum þess að kynnast henni betur.

Alþjóðaheilbrigðismálastofnunin WHO telur að akstur vegna farsímanotkunar sé einn stærsti áhættuþáttur umferðarslysa í heiminum.

Allt bendir til þess að fólk sem notar síma við akstur sé fjórum sinnum líklegra til að lenda í slysi. Þá er tuttugu og þrisvar sinnum líklegra að fólk sem les og eða skrifar skilaboð meðan á akstri lendi í slysi. Nú hefur Samgöngustofa í samvinnu við tryggingarfélagið Sjóvá ákveðið að hrinda af stað herferð gegn farsímanotkun sem ber yfirskriftina "EKKI TAKA SKJÁÁHÆTTUNA" Það er hættulegt að tala í síma undir stýri. Gunnar Geir Gunnarsson deildarstjóri öryggis- og fræðsludeildar Samgöngustofu kemur til okkar.

Íbúar í Ölfusi eru að fara að kjósa samhliða forsetakosninunum um hvort þeir vilji breyti á deiluskipulagi þannig að mölunarverskmiðja Hedelberg geti risið í næsta nágrenni við Þorlákshöfn. Það er búið að boða til íbúðarfundar í kvöld og hingað er komin Ása Berglind Hjálmarsdóttir bæjarfulltrúi í minnihluta bæjarstjórnar Ölfuss.