Síðdegisútvarpið

14. júlí

Almannavarnir hafa boðað til upplýsingafundar á morgun kl. 11. Ástæðan er fjölgun kórónuveirusmita en fimm greindust í gær með veiruna - öll utan sóttkvíar. Þar af voru þrjú bólusett. Hvað þýðir þetta og kallar þetta á aðgerðir á nýjan leik nú um hásumar þegar ferðamenn flykkjast til landsins, Íslendingar í sumarfríum eru á ferð og flugi og fjölmenn mannamót eru á dagskrá um allt land? Þórólfur Guðnason sóttvarnalæknir verður á línunni.

Bastilludagurinn, þjóðhátíðardagur Frakklands, er haldinn hátíðlegur í dag 14.júlí. Enn eru takmarkanir í gildi þar í landi svo hátíðarhöld verða enn með óvenjulegu sniði. Róbert Róbertsson veitingamaður er búsettur í París og ætlar að segja okkur hvernig stemningin er.

Íslenska fyrirtækið Svarmi, sem hefur sérhæft sig í kortlagninu og mælingum með drónum, eru ásamt Strætó stórir þátttakendur í Evrópuverkefni um sjálfvirka dróna sem nota Strætó sem ?dokkur? til að hlaða sig og ferðast á milli staða. Kolbeinn Ísak Hilmarsson framkvæmdastjóri Svarma segir okkur meira.

Icelandair Group ætlar í samstarf við tvö fyrirtæki sem vinna að því að útbúa farþegaflugvélar sem ganga fyrir umhverfisvænum orkugjöfum; rafmagni og vetni. Stefnan er að flugvélar sem notaðar eru í innanlandsflugi verði rafmagns- eða vetnisvélar. Jens Þórðarson framkvæmdastjóri flugrekstrar hjá Icelandair segir okkur meira.

Nokkuð hefur borið á því að fólk stökkvi út í ískalda jökulána í Stuðlagili. Jónas Guðmundsson hjá Landsbjörg talar við okkur um hætturnar sem fylgja því að stökkva út í ískaldar jökulár eins og gerist reglulega í Stuðlagili.

Sundballethópurinn Eilífðin, sem samanstendur af systrunum Margréti Erlu og Vigdísi Perlu Maack, stendur fyrir sundballettímum í sundlaugum Reykjavíkur í sumar. Þar fá sundgestir að læra ýmis balletttrix eins og mynsturæfingar, kertastjakann, sumarbústaðinn og snjókornið. Margrét Erla Maack, fjöllista og fjölmiðlakona, verður á línunni og segir okkur frá sundballett.

Birt

14. júlí 2021

Aðgengilegt til

14. júlí 2022

Síðdegisútvarpið

Þau Andri Freyr Viðarsson, Guðrún Dís Emilsdóttir og Hrafnhildur Halldórsdóttir halda landanum vel upplýstum um menn og málefni á leið úr vinnu á daginn. Þau fylgjast vel með fréttum og dægurmálum og spila nóg af góðri tónlist.