Umsjón: Hulda G. Geirsdóttir og Jóhann Alfreð Kristinsson.
Fram kemur á vef Matvælastofnunar að stofnunin hafi kært tvo bændur á Norðurlandi vestra til lögreglu fyrir að hundsa fyrirmæli yfirdýralæknis um að afhenda kindur sem þeir höfðu fengið frá nágrannabæ þar sem upp hafði komið riða og allt fé skorið niður í kjölfarið. Sigurborg Daðadóttir yfirdýralæknir segir í viðtali við Vísi í dag að ekkert annað hafi verið í stöðunni enda í gildi lög um dýrasjúkdóma sem þarna hafi verið brotin. Gunnar Þorgeirsson formaður Bændasamtaka Íslands kom til okkar og ræddi þetta mál og fleiri er tengjast landbúnaðinum.
Reykjavíkurborg tók upp á þeirri nýlundu að bjóða frítt í öll tæki í Fjölskyldu- og húsdýragarðinum í sumar. Þar hefur verið mikil stemmning undanfarið og Jóhann Alfreð kíkti niður í garð, ræddi meðal annars við Aron Jóhannsson starfsmann garðarins og Lovísu Lóu Sigurðardóttur, sem sér um smíðaverkstæðið í garðinum, auk gesta og gangandi.
Við heyrðum af akstursíþróttum í þættinum, en á laugardaginn fer Ljómarallið fram í Skagafirði. Katrín María Andrésdóttir kíkti til okkar í rallýspjall.
Steiney Skúladóttir er á Þórshöfn á Langanesi þar sem hún hitti á Karen Konráðsdóttur eiganda Lyngholts sem sagði henni af veitingarekstri, húsnæðisuppbyggingu og fleiru áhugaverðu er svæðið varðar.
En við byrjuðum að venju á því að heyra í okkar manni í Brussel, Birni Malmquist, hann fylgist með fólki og fréttum þar ytra og sagði okkur m.a. af för sinni á frægan flóamarkað.
Tónlist:
STEBBI JAK - Líttu í kringum þig.
DAVID KUSHNER - Daylight.
CHICAGO - Saturday In The Park.
REM - Man On The Moon.
JÓNAS SIG - Vígin falla.
GUSTAPH - Because Of You (Belgía Eurovision 2023).
BLINK 182 - I miss you.
BJARTMAR & BERGRISARNIR - Negril.
ROLLING STONES - Shes a rainbow.