Svo virðist sem íbúar í miðborginni þurfi núna að greiða stöðumælagjald fyrir einkastæðið sitt eins og fjölskylda Önnu Ringstead fékk að reyna á dögunum samkvæmt umfjöllun Morgunblaðsins. Bílastæðagjöld í miðbænum hækkuðu um 40% í október á síðasta ári og sitt sýnist hverjum að það sé farið að seilast í einkastæðin.
Við heyrum í Dóru Björt Guðjónsdóttur, oddvita Pírata í borgarstjórn og formanni Umhverfis- og skipulagsráðs sem ætlar að útskýra þetta allt saman fyrir okkur.
https://www.mbl.is/frettir/innlent/2024/02/01/sektud_fyrir_ad_leggja_i_einkastaedi_sinu/?fbclid=IwAR3rMdYlCenwNH6rwHT_gZyctaaOvWbQWvi-xGP47g2f2z_FsyRqlwH5jkg
Og ef þið hélduð að asahlákan væri óþolandi, þá spáir Alþjóðaheilbrigðismálastofnunin (WHO) að fjöldi nýrra krabbameinstilfella fari yfir 35 milljónir árið 2050, en það er 77% fjölgun miðað við tilfelli fyrir árið 2022. Ísland sleppur auðvitað ekkert við þessa þróun en Sigríður Gunnarsdóttir, forstöðumaður rannsóknar og þróunarseturs Krabbameinsfélagsins, ætlar að ræða við okkur um þennan skelfilega vágest.
Þá er hart deilt um skemmda vatnslögn í Vestmannaeyjum, en HS Veitur vilja að Vestmannaeyjabær leysi til sín hálf ónýta lögn sem skemmdist fyrr í vetur. Við ræðum við Írísi Róbertsdóttur, bæjarstjóra Vestmannaeyja um þetta flókna mál.
Minningarsjóður Svavars Péturs var stofnaður með það að leiðarljósi að halda minningu einstaks listamanns á lofti en Svavar Pétur lést í september árið 2022. Nú er búið að opna fyrir umsóknir að sjóðnum og Berglind Haesler segir okkur allt um það hvaða reglur gilda um umsækjendur og hverjir koma til greina.
Haraldur Sveinbjörnsson tónskáld sem gengur undir listamannsnafninu Red Barnett ætlar að halda tónleika í Bæjarbíói þann 8. feb. nk. Þetta eru síðbúnir útgáfutónleikar plötu sem kom út í Covid og ekkert var hægt að gera og nú á að bæta úr því. Við ætlum að ræða við vini Halla, þá Finn Beck og Hannes Friðbjarnarson, en þeir stofnuðu hljómsveit með honum árið 1986 í Kársnesskóla í Kópavogi og eru enn að.
