Við ætlum að heyra í Einari Þorsteinssyni borgastjóra og ræða kjarasamningana sem eru á lokametrunum. Borgarráð samþykkti í dag að taka þátt í yfirlýsingu ríkisins og sveitarfélaga við gerð kjarasamninga til fjögurra ára sem felur meðal annars í sér að halda aftur af hækkunum á gjaldskrám þjónustu sem snýr að barnafjölskyldum og tryggja að skólamáltíðir verði gjaldfrjálsar. Við ætlum að fá Einar til að segja okkur betur frá þessu á eftir en auk þess að vera borgarstjóri er hann í stjórn samtaka sveitarfélaga á höfuðborgarsvæðinu og í stjórn sambands íslenskra sveitarfélaga.
Samkvæmt nýrri könnun frá Vörðu sem er rannsóknastofnunar vinnumarkaðarins kemur í ljós að fjögur af hverjum tíu á vinnumarkaði eiga erfitt með að ná endum saman og svipað hlutfall getur ekki mætt óvæntum 80.000 kr. útgjöldum án þess að stofna til skuldar. Samkvæmt könnuninni þarf sérstaklega að bregðast við stöðu barnafólks og innflytjenda. Kristín Heba Gísladóttir er framkvæmdastjóri Vörðu hún kemur til okkar á eftir og fer yfir helstu niðurstöður þessarar könnunar.
Þrátt fyrir að í dag sé fimmtudagur þá verður Kveikur á dagskrá Rúv í kvöld. Ástæðan er stóra mansalsmálið sem hefur verið í fréttum undanfarna daga en grunur leikur á að tugir manna hafi verið beittir vinnumansali sem tengist meðal annars veitingastöðunum Pho Vietnam og WoK On. Um nokkurt skeið hafa Urður Örlygsdóttir fréttamaður og Arnar Þórisson dagskrárgerðarmaður unnið að fréttaskýringu er snýr að þessu máli og þau setjast hjá okkur á eftir.
Frumvarp um dánaraðstoð er á dagskrá Alþingis í dag. Fyrsti flutningsmaður frumvarpsins er Katrín Sigríður J. Steingrímsdóttir þingmaður Viðreisnar og hún ætlar að koma til okkar á eftir og við spyrjum hana hvers vegna hún telji nauðsynlegt að dánaraðstoð verði lögleg á Íslandi.
í dag var haldið málþing sem bar yfirskriftina Landslagið í landbúnaði og matvælaframleiðslu en fjölmargir aðilar sem tengjast landbúnaði og framleiðslu matar komu að þinginu. Áshildur Bragadóttir frá landbúnaðarháskólanum á Hvanneyri kemur til okkar og segir okkur frá því helsta sem þar kom fram.
Og á fimmtudögum þá förum við í MEME vikunnar með Atla Fannari Bjarkasyni.
En við byrjum á þessu: Ný rannsókn sýnir að það eru veruleg jákvæð áhrif af beinu millilandaflugi frá Akureyri og farþegar telji að flugið hafi aukið lífsgæði til muna. Á línunni hjá okkur er Hjalti Páll Þórarinsson hjá Markaðsstofu Norðurlands.
