Síðdegisútvarpið

Dr.Football,Þorgerður Katrín og Silja Bára um hörkuna í forsetakosningunum vestanhafs

Það er engin lognmolla í stjórnmálunum en Katrín Jakobsdóttir forsætisráðherra íhugar alvarlega að bjóða sig fram til forseta en hún mun tilkynna um ákvörðun sína á næstu dögum. Óhætt er að segja að ákveðin óvissa sé í ríkisstjórnarsamstarfinu vegna þessa. Við ætlum að heyra í Þorgerði Katrínu Gunnarsdóttur formanni Viðreisnar á eftir og ræða þessi mál við hana.

Aukinn hiti er að færast í leikinn um baráttuna um forsetastólinn í Bandaríkjunum og síðast í gær líkti Donald Trump fyrrverandi forseti Bandaríkjanna og forsetaframbjóðandi farand og flóttafólki við dýr í kosningaræðu í Michigan. Við ætlum að heyra í Silju Báru Ómarsdóttur stjórnmálafræðiprófessor en hún er einmitt stödd vestanhafs og ræða stöðuna í bandarískum stjórnmálum við hana.

Akureyringar ráku upp stór augu í morgun þegar þeim var litið á Hlíðarfjall og sáu að gríðarstórt snjóflóð hafði fallið í fjallinu nokkuð norðan við sjálft skíðasvæðið.

Flóðið var framkallað af mannavöldum í öryggisskyni og við ætlum að heyra í Jóni Páli Eyjólfssyni sem er í forsvari fyrir fyrirtækið 1001 Tindur, en fyrirtækið sérhæfir sig í áhættumati fyrir snjóflóð.

Fyrsta umferð Bestu deildar karla er um helgina og við ætlum að spá aðeins í spilin með Dr. Football, Hjörvari Hafliðasyni, sem sest niður með okkur strax að loknum fimm fréttum.

Jóhanna Vigdís Hjaltadóttir fréttamaður hefur fylgst náið með gangi mála í pólitíkinni í dag og hún ætlar að koma til okkar eftir smá stund.

Frumflutt

3. apríl 2024

Aðgengilegt til

3. apríl 2025

Þau Valur Grettisson, Guðrún Dís Emilsdóttir og Hrafnhildur Halldórsdóttir halda landanum vel upplýstum um menn og málefni á leið úr vinnu á daginn. Þau fylgjast vel með fréttum og dægurmálum og spila nóg af góðri tónlist.