Sálfræðideild Háskólans í Reykjavík og VIRK Starfsendurhæfingarsjóður buðu upp á opna málstofu um kulnun og staðreyndir og mýtur hvað málefnið varðar. Þær Berglind Stefánsdóttir og Guðrún Rakel Eiríksdóttir verkefnastjórar frá VIRK ræddu þar algengi kulnunar á vinnumarkaði hér heima og þær ætla að kíkja til okkar og bregða ljósi á þá stöðu.
Ostarnir Camembert og Brie gætu nú talist í útrýmingarhættu þar sem sveppurinn sem notaður er við framleiðslu þeirra er hættur að geta fjölgað sér. Setningin ein kallar á ansi margar spurningar. Eru gæðaostar að hverfa? Hvað eigum við þá að bjóða upp á með júróvisjóninu? Og er sveppur notaður við framleiðslu ostsins? Við í Síðdegisútvarpinu fórum á stúfana og fundum færasta ostasérfræðing landsins, sem mun vera Eirný Sigurðardóttir, eigandi sælkeraverslunarinnar Búrsins.
Eftir að hafa þurft að dúsa í gæsluvarðhaldi í fimm ár, kemur í ljós í næstu viku hvort Julian Assange fær heimild til að áfrýja framsalsmáli sínu einu sinni til viðbótar. Ef svarið verður nei, er óttast að hann verði fluttur til Bandaríkjanna þar sem hans bíða herréttarhöld sem fæstir trúa að verði mjög réttlát. Kristinn Hrafnsson er ritstjóri Wikileaks og er staddur í London þessa stundina. Hann ætlar að útskýra fyrir okkur hver staðan er, og hvort þessu umdeilda máli sé að ljúka.
Þá ætlar Heimdallur að jarðsyngja Reykjavíkurborg í kvöld. Það er að segja ungir Sjálfstæðismenn, sem trúa því að hjarta borgarinnar sé endanlega hætt að slá. Júlíus Viggó Ólafsson formaður Heimdallar, ætlar að koma til okkar og ræða þessa mögulegu ótímabæru andlátsfregn.
Tónlistarkonurnar Fríða Dís Guðmundsdóttir og systurnar Soffía Björg og Karítas Óðinsdætur snúa bökum saman í kvöld og halda tónleika á skemmtistaðnum Kex hostel við Skúlagötu í Reykjavík. Þær eru allar með mörg járn í eldinum og til þess að gefa okkur smá sýn þá koma þær Fríða og Soffía til okkar vopnaðar Pétri Ben og gítarnum hans.
Jón Gunnar Margeirsson, framkvæmdastjóri flutningafyrirtækisins Jóns og Margeirs segir djúpan pirring á meðal Grindvíkinga vegna þess að Bláa lónið hefur opnað starfsemi sína á ný. Þá þurfa önnur fyrirtæki sem og íbúar í Grindavík að sætta við strangar takmarkanir almannavarna vegna hættuástandsins sem þar hefur skapast í kringum eldgosahættuna. Jón Gunnar er á línunni.
