Hundabólusetningar eru eitthvað sem flestir hundaeigendur telja sjálfsagðan hluta af umönnun gæludýrsins síns. En nú er uppi óvenjuleg staða því hundabóluefni er ekki fáanlegt hér á landi og því hafa dýralæknar ekki getað tekið við hundum í reglubundnar bólusetningar. Hvað þýðir þetta fyrir hundaeigendur, hversu alvarleg er staðan og hvenær má búast við að bóluefni verði aftur á boðstólum? Við ætlum að ræða þetta við Halldóru Hrund Guðmundsdóttur, dýralækni hjá Dýraspítalanum í Víðidal.
Finnur Oddson, forstjóri Haga, verður gestur okkar á eftir. Við ætlum að ræða við hann um innkaupasamstarf Haga og Salling Group sem að þeirra sögn hefur áhrif á matarkörfu íslenskra heimila. Tilfinning neytenda er þó að matarkarfan hækki og hækki með þekktum afleiðingum á verðbólguna. Hvað er hægt að gera betur hjá dagvöru risunum til að sporna við hækkandi verðbólgu?
Við ætlum að slá á þráðinn vestur í Stykkishólm en þar verða Danskir dagar haldnir hátíðlegir um helgina - sú sem allt veit um þá veislu heitir Ólöf Inga Stefánsdóttir og er framkvæmdastjóri hátíðarinnar hún verður á línunni.
Um miðjan júní lagði sjósundsmaðurinn Sigurgeir Svanbergsson af stað í metnaðarfulla tilraun til að synda endilangt Lagarfljótið, en þurfti að hætta eftir 15 kílómetra vegna ofkælingar. Nú ætlar hann að reyna aftur um helgina, betur undirbúinn og við hagstæðari aðstæður. Markmiðið er að ljúka þessari einstöku þrekraun og um leið safna fé fyrir Píeta-samtökin. Við heyrum í Sigurgeiri.
Finnur Pálmi Magnússon skrifaði áhugaverðan pistil á Facebook þar sem hann var að velta fyrir sér hávaðamengun frá Reykjavíkurflugvelli og fannst hún hafa aukist töluvert undanfarin ár eða áratugi. Hann lagðist í rannsóknarvinnu með aðstoð gervigreindarinnar og niðurstaðan er áhugaverð. Finnur Pálmi ætlar segja okkur meira af þessu grúski sínu.
bei
Tónlistarhátíðin Kveldúlfur verður haldin í annað sinn um helgina. Hátíðin fer fram á Hjalteyri og er óhagnaðardrifinn menningarviðburður. Tilgangurinn er að skapa stuð og stemningu sem tosar ekki of mikið í budduna. Fjölbreyttur hópur íslensks tónlistarfólks kemur fram. Við hringjum í Söru Bjarnason sem er einn skipuleggjenda.
