Á hverju ári á Menningarnótt þarf Strætó að breyta ferðum sínum í gegnum miðborgina og farþegar þurfa að vera viðbúnir slíkum breytingum. Þá mun strætó sjá til þess að koma fólki heim hratt og örugglega eftir að flugeldasýningu líkur. En hvernig verður þessu háttað? Við heyrðum í Davíð Þorlákssyni , framkvæmdastjóra Almenningssamgangna höfuðborgarsvæðisins ohf., sem rekur strætó.
Ragnar Jón Hrólfsson fréttamaður kom til okkar og fræddi okkur um framvindu Reykholtsmálsins í dómsal.
Fréttir af vasaþjófum eru tíðar og nú síðast í dag voru einhverjir gripnir við slíka iðju á Þingvöllum. En hvernig bera þjófarnir sig að og hvernig getur almenningur reynt að verjast slíkum þjófnaði? Jóna Kolbrún Sigurjónsdóttir er verkefnisstjóri í Þjóðgarðinum á Þingvöllum við heyrðum í henni.
Fréttaþátturinn Vikulokin sem verið hefur um árabil á laugardagsmorgnum á Rás 1 bætist nú við dagskránna á Rás 2 frá og með morgundeginum. Ingvar Björnsson tekur við stjórnartaumum. Hann leit við hjá okkur.
Á miðvikudaginn verður haldinn áhugaverður morgunverðarfundur með yfirskriftinni Lærdómur úr skotgröfunum - Reynslusögur af ríkisstuddum netárásum. Þar fara sérfræðingar í netöryggi frá CERT-IS Varist, Keystrike og Íslandsbanka yfir árásir skipulagðra glæpasamtaka sem eru fjármagnaðar af óvinveittum þjóðríkum og reynslu sína af því að takast á við slíkar árásir. Þeir komu til okkar þeir Finnbogi Finnbogason tæknistjóri og einn stofnanda Varist og Ýmir Vigfússon tæknistjóri og einn stofnanda Keystrike.
Siggi Gunnars leit við og fór yfir dagskrána á Tónaflóði Rásar 2 á Menningarnótt
Harley Davidsson eigendur ætla að sýna sig og sjá aðra á Menningarnótt og gefst gestum kostur á að skoða og fara á rúntinn með bílstjórum hjólanna. Gunnar Þór Guðmundsson er Harley mótorhjólakappi og hann kom til okkar og sagði okkur betur frá.
Kristín Þórðardóttir hefur verið skipuð í embætti sýslumanns Íslands. Hún verður fyrst til að gegna því embætti sem er nýtt. Við breytinguna verða níu sýslumannsembætti að einu. Við heyrðum í Kristínu í þættinum.
Umræða um höfundarétt og notkun eða misnotkun gervigreindarinnar á henni er alltaf að aukast. Ómar Smári Kristinsson myndlistarmaður á Ísafirði greindi frá því að Facebook að hann hafi lent í slíkum stuldi. Hann teiknar gamaldags þrívíddarkort af t.d. Ísafirði en rakst síðan á samskonar kort sem var alfarið unnið af gervigreind. Og það kort var ekki nákvæmara en svo að Ísafjörður er þar harla ólíkur sjálfum sér. Ómar Smári var á línunni.
