Peningastefnunefnd Seðlabanka Íslands tilkynnti í morgun þriðju vaxtahækkunina í röð frá því í mars og standa stýrivextir nú í 8%. Seðlabankastjóri telur síðustu hækkanir hafa skilað árangri en nefndin spáir því að verðbólga hjaðni eftir áramót. Jón Guðni Ómarsson bankastjóri Íslandsbanka kom til okkar og ræddi þessi mál.
Fleiri upptökur úr síma Andra Más Mortensen Birgissonar voru spilaðar í Héraðsdómi Suðurlands í dag þar sem aðalmeðferð Reykholtsmálsins var fram haldið. Allir ákærðir hafa nú komið fyrir dóm og hefur unnusta Andra Más játað að hafa tekið þátt í að svipta brotaþolann frelsi. Ragnar Jón Hrólfsson fréttamaður kom til okkar en hann var í Héraðsdómi Suðurlands í dag.
Menningarnótt í Reykjavík fer fram á laugardaginn er vænta má að hún verði sérstaklega glæsileg í ár því Reykjavíkurborg fagnar 240 ára afmæli. Við fórum yfir það helsta með þeim Björgu Jónsdóttur og Aðalheiði Sveinsdóttur verkefnastýrum.
Alþingiskonan Sigríður Á. Andersen nýtti sumarfríið heldur betur vel. Hún keppti á Evrópumeistaramótinu í bekkpressu í Litháen, vann til bronsverðlauna og setti nýtt Íslandsmet í sínum flokki. Sigríður keppti í -63 kg flokki öldunga 2. Hún lagði einnig sitt af mörkum til að íslenska liðið hafnaði í þriðja sæti í liðakeppni öldunga 2. Sigríður Á. Andersen var gestur Síðdegisútvarpsins í dag.
Nýr íslenskur lestrarleikur, LESA, hefur nú verið formlega kynntur en markmiðið er að hjálpa yngstu hópunum að ná góðum tökum á lestri með því að sameina sögur, lesskilning og leikjafræði. Börnin fá nýja sögu á hverjum degi, vinna sér inn verðlaun og kynnast um leið íslenskri menningu og hefðum. Á bak við verkefnið stendur lítið nýsköpunarteymi með stóra drauma um að efla lestur barna um allt land. Til að segja okkur nánar frá þessu spennandi verkefni komu þeir til okkar þeir Arnar Hinriksson og Birgir Hrafn Birgisson
Við hringdum austur í Grímsnes þar sem verið er að leggja lokahönd á undirbúning fyrir Grímsævintýrin sem fara fram á Borg um helgina. Þar verður fjölbreytt dagskrá fyrir alla fjölskylduna. Ein þekktasta hefð í sveitinni er Tombólan sem hefur verið haldin í 100 ár hvorki meira né minna. Laufey Guðmundsdóttir hjá Kvenfélagi Grímsneshrepps var á línunni.
