Stór hópur ferðamanna lét greipar sópa um söluskála á Freysnesi í Öræfum í gærmorgun. Um tíu manns á húsbílum gengu hring eftir hring um verslunina, stungu vörum í vasana og náðist það allt á eftirlitsmyndavélar. Við hringdum austur í Freysnes og heyrum í eiganda Hótels Skaftafells og söluskálans Freysness í Önnu Maríu Ragnarsdóttur.
Skíðavikan á Ísafirði hefur verið haldin nær sleitulaust frá árinu 1935, þegar Skíðafélag Ísfirðinga bauð landsmönnum öllum vestur á Ísafjörð til að „anda að sjer hinu dásamlega háfjallalofti Vesturlands, og bruna á fleygiferð niður hinar glæsilegu skíðabrekkur sem þar eru“ eins og segir í frétt Morgunblaðsins um hátíðina sem birtist í blaðinu þann 2. apríl 1935. Og að sjálfsögðu fer Skíðavikan fram fyrir vestan um þessa páska. Helga Þórdís Björnsdóttir sagði okkur hvað er í boði.
Mikið magn bóka endar í ruslinu á hverju ári hér á landi en umræða um þessi mál kviknaði enn á ný um helgina þegar Hallgrímur Helgason rithöfundur birti myndir á FB af bókum meðal annars bókum Halldórs Laxness og Þórbergs Þórðarsonar í gámi hjá Sorpu. En er það virkilega svo að við verðum að henda bókum sem enginn hefur not fyrir? Gunnar Dofri Ólafsson frá Sorpu kom til okkar í dag
Í síðustu viku var ný skýrsla frá Rannsóknarnefnd samgönguslysa birt en þar er varpað ljósi á alvarlegt banaslys sem varð í Borgarfirði á síðasta ári með þeim afleiðingum að lítið barn lést. Þar kemur meðal annars fram að barnabílstóll hafi brotnað við höggið, þrátt fyrir að uppfylla alla staðla. Það vekur upp mikilvægar spurningar um öryggi barnabílstóla og hvort kröfurnar sem gerðar eru í dag séu nægilega strangar. Hversu öruggir eru bílstólar í raun – og geta foreldrar treyst þeim? Herdís Björk Brynjarsdóttir teymisstjóri hjá HMS kom til okkar á eftir.
Áhugi á tölvuleikjagerð fer vaxandi í heimi skapandi greina – en hvað liggur raunverulega að baki ferlinu? Í næstu viku verður haldinn viðburður þar sem farið er ofan í skapandi ferli tölvuleikja og hvernig hugmyndir verða að leikjum. Steinunn Hauksdóttir frá Rannsóknarsetri skapandi greina var á línunni.
Hvað er ruslmenning á netinu? Árni Matthíasson, sérfræðingur á fréttastofu RÚV fór yfir það með okkur.
