Innviðaráðherra sagði í hádegisfréttum í dag að ekki standi til að setja lög á verkfallsaðgerðir flugumferðarstjóra að svo stöddu. Stjórnvöld fylgist hins vegar vel með kjaradeilunni og mikilvægt sé fyrir viðsemjendur að ná samkomulagi sem fyrst. Ekkert hefur verið fundað í kjaradeilu flugumferðarstjóra við Samtök atvinnulífsins frá því fyrir helgi og engar viðræður verið boðaðar á næstu dögum. Flugumferðarstjórar lögðu niður störf tvisvar í síðustu viku og aftur í morgun milli klukkan fjögur og tíu.
Aðgerðirnar hafa haft mikil áhrif á millilandaflug. Bæði Icelandair og Play segja að tjónið sé þegar orðið verulegt. En hvað þýðir það ef sett yrðu lög á verkfallsaðgerðirnar ? Gylfi Dalmann Aðalsteinsson er vinnumarkaðssérfræðingur hann segir okkur allt um það.
Komin er niðurstaða í kostnaðarskiptingu ríkis og sveitarfélaga vegna þjónustu við fatlað fólk, en fulltrúar stjórnvalda skrifuðu undir samning þes efnis fyrir helgi. Umfangsmikil greiningarvinna hefur farið fram á tilurð kostnaðarauka sveitarfélaga á undanförnum árum sem liggur að baki niðurstöðunni. Við ætlum að heyra í Guðmundi Inga Guðbrandssyni félags og vinnumarkaðsráðherra á eftir og fá hann til að fara yfir þessi mál með okkur.
Vilborg Davíðsdóttir er rithöfundur sem hefur sérhæft sig í ritun sögulegra skáldsagna en fyrsta bók hennar, Við Urðarbrunn, kom út árið 1993. Sögusvið þeirrar og næstu bókar á eftir er um aldamótin 900 og segja frá baráttu norsk-írskrar ambáttar fyrir frelsi úr ánauð. Tíunda bók Vilborgar heitir Undir Yggdrasil og kom út 2020. Hún fjallar um Þorgerði Þorsteinsdóttur, sonardóttur Auðar djúpúðgu. Seinna bindið í sögu völvunnar Þorgerðar, Land næturinnar, er nýjasta bók Vilborgar en Þar heldur Þorgerður í Austurveg en það er heitið sem norrænir menn á víkingaöld höfðu á verslunarleiðinni úr Eystrasalti um stórfljót Austur-Evrópu og allt suður til Konstantínópel, höfuðborgar hins kristna heims. Viðlborg kemur til okkar á eftir og segir okkur frá áhuganum á sögulegum skáldskap sem og ýmsu öðru,
Fyrir helgi fengu íbúar og gestir í 22 byggingum að Eiðum hitaveitu í hús sín í fyrsta sinn, fimm mánuðum eftir að byrjað var að leggja heitavatnsleiðslu til svæðisins. Á Eiðum var um áratugaskeið menntasetur en þar var gamli Alþýðuskólinn. Nú hafa stórhuga aðilar keypt Eiðasvæðið og hyggja þeir á endurnýjun og uppbyggingu þar á næstu árum. Við ætlum að heyra í Einari Ben Þorsteinssyni á eftir en hann er einn þeirra sem keypti svæðið og spyrja hann útí uppbygginguna að Eiðum.
Sigríður Thorlacius söngkona stendur í ströngu þe
