Umsjón: Hulda G. Geirsdóttir og Júlía Margrét Einarsdóttir.
Lögreglustarfið er sannarlega fjölbreytt og dagar lögreglufólks eru oft á tíðum skrautlegir. Frá þessu starfi hafa verið sagðar ýmsar sögur af sorgum og gleði, háska og hættum og öllu þar á milli. Júlíus Einarsson þjóðfræðingur sem sjálfur hefur starfað í ýmsum deildum lögreglunnar safnar þessum sögum saman í bók sem er í smíðum og nefnist Lögreglumenn - með þeirra eigin orðum. Júlíus sagði okkur frá.
Að venju ætlar margt fólk að hlaupa í Reykjavíkurmaraþoninu, ekki bara sér til heilsubótar, heldur líka til að styrkja gott málefni. Við fengum þær Kolbrúnu Tómasdóttur og Ingibjörgu Freyju Gunnarsdóttur til okkar, en Ingibjörg hleypir fyrir félagið Gleym mér ei.
Oddur Sigurðsson formaður starfsmannafélags Íslandsbanka steig í pontu á hluthafafundi bankans í morgun og ræddi stöðu starfsfólks bankans í tengslum við umdeilda sölu á hlutum í bankanum. Hann sagði málið hafa lagst þungt á fjölda starfsfólk og langt væri frá því að allt starfsfólk væri á ofurlaunum eða hefði haft nokkuð með söluna að gera. Oddur var gestur okkar.
Nú stendur yfir undirskriftasöfnun fyrir Elísabetarstíg sem margir vilja að verði nafnið á stíg sem liggja mun á milli Sólvallagötu og Hringbrautar. Hann átti að kenna við Pétur Hoffmann og kalla hann Hoffmannsstíg en ýmsum þykir nóg um alla karlana sem fá götur nefndar í höfuð sér og leggja til að hann verði heldur kenndur við skáldkonuna Elísabetu Jökulsdóttur. Elísabet styður þessa undirskriftasöfnun og hún var á línunni.
Knattspyrnumótið REY CUP stendur sem hæst en þar spila fjölmörg lið, innlend og erlend, fótbolta af miklum móð í Laugardalnum og nágrenni. Við heyrðum í Gunnhildi Ásmundsdóttur framkvæmdastjóra mótsins sem stödd er í hringiðunni og fjörinu í dalnum.
Í lokin náðum við skottið á Steiney Skúladóttur sem er á ferð um Norðausturland og heyrðum af því þegar hún kíkti inn á hársnyrtistofuna Háriðjuna og ræddi við Elínu Sigurðardóttur, Sigurborgu Ósk Haraldsdóttur og Dagný Önnu Laufeyjardóttur.
Tónlist:
200.000 NAGLBÍTAR - Brjótum Það Sem Brotnar.
SPENCER DAVIS GROUP - Keep On Running.
JÓNAS SIG - Þyrnigerðið.
HLH & SIGRÍÐUR BEINTEINSDÓTTIR - Vertu Ekki Að Plata Mig.
HREIMUR - Get ekki hætt að hugsa um þig.
TEARS FOR FEARS - Everybody Wants To Rule The World.
MUGISON - Stóra stóra ást.
SÁLIN HANS JÓNS MÍNS - Kanínan.
LENNY KRAVITZ - Always on the run.
SIGURÐUR GUÐMUNDSSON OG MEMFISMAFÍAN - Síðasti móhítóinn.
PAVEMENT - Range life.