Viðreisn hefur sent forsætisráðherra erindi og farið fram á að Alþingi verði kallað saman vegna Íslandsbankamálsins. Hanna Katrín Friðriksson þingflokksformaður Viðreisnar var á línunni hjá okkur.
Árni Freyr Stefánsson, skrifstofustjóri samgangna í Innviðaráðuneytinu sagði okkur frá niðurstöðum ferðavenjukönnunar sem framkvæmd var í lok árs 2022. Í könnuninni voru ferðavenjur fólks mældar fyrir alla samgöngumáta og niðurstöður teknar saman fyrir landið allt, einstaka landshluta, sveitarfélög og hverfi.
Hverfur lífsneistinn þegar við áttum okkur á að við erum týnd, stödd á miðpunkti lífsins hvort sem okkur líkar betur eða verr? Þetta er inntak skáldsögunnar Miðpunktur eftir Drífu Viðarsdóttur og Ernu Rós Kristinsdóttir, en þær stöllur, sem búa sitt hvoru megin við Atlantshafið, tóku sig til í heimsfaraldri og sömdu samtímasögu um breytingaskeið karla og kvenna.
Við köfuðum í undirheima Reykjavíkur í dag, nánar tiltekið í undirheima mauranna, þegar við fengum til okkar þá Andreas Guðmundsson, nýútskrifaðan líffræðing, og Arnar Pálsson prófessor á Líf- og umhverfisvísindadeild HÍ. Andreas hefur rannsakað maura um nokkurt skeið og þeir Arnar eru meðal vísindamanna sem rannsaka hvort hugsanlega geti leynst svokallað ofurmaurabú undir Reykjavík. Við ræddum maura, lúsmý o.fl. við þá félaga.
Von er á stórskotaliði úr alþjóðlega fræðaheiminum til landsins, þegar hinn þekkti háskóli Yale stendur fyrir alþjóðlegu námskeiði í Háskóla Íslands sem ætlað er kennurum og nemendum víðs vegar að. Á námskeiðinu verður farið í saumana á svokallaðri Life Worth Living nálgun sem er upprunnin í Yale og nýtur gríðarlegra vinsælda víða um heim. Þau Ólafur Páll Jónsson prófessor í heimspeki við HÍ og María Kristín Gylfadóttir hjá ráðgjafafyrirtækinu North Consulting komu til okkar og sögðu okkur meira.
Grindhvalavaða hefur haldið til við Ólafsvík undanfarið. Nokkrum sinnum hefur hópurinn komið mjög nærri landi og verið nálægt því að stranda. Björgunarsveitarfólk hefur náð að stugga dýrunum frá landi, en Náttúrustofa Vesturlands biðlar til fólks á svæðinu um að hafa samband ef það sér dýrin nálægt landi. Róbert Arnar Stefánsson líffræðingur og forstöðumaður Náttúrustofu Vesturlands var á línunni hjá okkur og fór yfir stöðuna.
Tónlist:
FLOTT - L'amour.
PRINCE - Little Red Corvette.
Una Torfadóttir - Fyrrverandi.
JAIN - Makeba.
ADAM ANT - Goody two shoes (80).
GORILLAZ - Stylo.
STJÓRNIN - Hleypum gleðinni inn.
SIGRID - A Driver Saved My Night.
DUA LIPA - Dance The Night.
JÚNÍUS MEYVANT - Color Decay.
