Dagbjartur Sigurður Ólafsson er sextán ára gamall drengur sem var að ljúka við 10. bekk í Klettaskóla en þar hefur honum gengið vel og liðið vel. Dagbjartur er haldinn flóknum erfðasjúkdómi sem hefur í för með sér þroskahömlun og einhverfu og þarf hann því aðstoð við allar athafnir daglegs lífs. Í dag er staðan sú að foreldrar Dagbjarts hafa fengið bréf frá Menntamálastofnun þar sem þeim var tjáð að enginn framhaldsskóli gæti tekið við Dagbjarti eins og er og því hlýtur staðan að vera flókin og erfið hjá þessari litlu fjölskyldu. Gyða Sigríður Björnsdóttir móðir Dagbjarts kemur til okkar í Síðdegisútvarpið.
Kröftug mótmæli voru haldin fyrir framan húsnæði Samtaka íslenskra sveitarfélaga í morgun. Það voru fimm mæður sem tóku sig til og skipulögðu mótmælin undir yfirskriftinni Við styðjum starfsfólk BSRB. Um 100 manns mættu og fóru foreldrar fram á að deiluaðilar semji strax. Foreldrar segja að þær aðstæður sem eru uppi í leikskólamálum séu óboðlegar. Astrid Jóhanna Kristjánsdóttir er ein þeirra sem skipulagði mótmælin en hún er búsett í Hveragerði ásamt manni sínum og fjórum börnum og hafa verkfallsaðgerðir sett daglegt líf fjölskyldunnar úr skorðum.
Eins og við greindum frá í gær þá segir Harry Bretaprins umfjöllun breskra götublaða, sem hleruðu síma hans, hafa valdið honum vanlíðan og skemmt sambönd við vini og fjölskyldu. Hann bar vitni í einkamáli sínu gegn Mirror Group í gær. Við ætlum að kafa aðeins dýpra í þessi réttarhöld hér á eftir og fáum til okkar Önnu Lilju Þórisdóttur sem veit allt um bresku konungsfjölskylduna.
Uppistandarinn Bylgja Babýlons býr í Edinborg en hún er að fljúga hingað til lands í dag til að frumsýna uppistandið Cancer Culture, um krabbameinsmeðferð sem hún fór í fyrir tveimur árum. Við ætlum að slá á til Bylgju á eftir þar sem hún verður nýlent í Keflavík og spyrja hana út í sýninguna sem fjallar um það hvernig sé að fara í gegnum krabbameinsmeðferð í miðjum heimsfaraldri.
Hvítar lygar er ný íslensk þáttaröð sem fjallar um fimm menntaskólanema, vináttu þeirra og áskoranir. Fimm einstaklingar á aldrinum 17-20 ára voru valdir til að taka þátt í að skapa og skrifa þáttaröðina undir leiðsögn Dominique Sigrúnardóttur leikstjóra og handritshöfundar. Þættirnir eru afrakstur samstarfs RÚV, Hins hússins og Reykjavíkurborgar og hafa hlotið gríðarlegt áhorf þrátt fyrir að vera nýkomnir í sýningu.
Agnes Wild teymisstjóri hjá Krakkaruv, Ágúst Örn Börgesson Wigum sem leikur Almar og Kristín Agnes Maguire sem leikur Rut koma til okkar á eftir og segja okkur b