Bæjarstjórn sveitarfélagsins Hornafjarðar sendi frá sér fyrir helgi ályktun vegna öryggismála í sveitarfélaginu þar sem að bæjarstjórn hvetur ríkisvaldið til að huga að grunninnviðum í samfélaginu, t.d með öflugri löggæslu, til að tryggja öryggi íbúa og ferðafólks á svæðinu. Fjöldi fólks sækir sveitafélagið Hornafjörð heim og haft hefur verið eftir Sigurjóni Andréssyni bæjarstjóra sveitarfélagsins að öryggismál hvíli þungt á fólki. Við ætlum að ræða þessi mál við Sigurjón hér á eftir en hann verður á línunni hjá okkur eftir stutta stund.
Fyrir skemmstu sáum við frétt þess efnis að 26 ára gömul kona Susan Saunders sem á íslenskan föður og ástralska móður fær ekki dvalarleyfi á Íslandi. Þar með getur hún ekki búið í sama landi og báðir foreldrar hennar en faðir Susan, Jón Waagfjörð er búsettur í Vestmannaeyjum ásamt móður hennar. Við ætlum að hringja til eyja á eftir og fá Jón til að segja okkur sögu þeirra og fara yfir það sem þau eru að kljást við í kerfinu.
Gísli Þorgeir Kristjánsson og Ómar Ingi Magnússon eru Evrópumeistarar í handbolta eftir að lið þeirra Magdeburg hafði betur gegn Kielce, 30-29. Gísli meiddist í undanúrslitaleiknum en náði undraverðum bata, skoraði sex mörk og var maður leiksins. Þorkell Gunnar Sigurbjörnsson íþróttafréttamaður náði sambandi við Gísla Þorgeir á zoom fyrr í dag og við heyrum viðtalið í þættinum.
Í dag er 19. júní og það er Kvenréttindadagurinn á Íslandi. Þá er því fagnað að konur á Íslandi 40 ára og eldri fengu kosningarétt þennan dag og kjörgengi til Alþingis árið 1915.
Kvenréttindafélagið fagnar í dag með útgáfu ársrits sem kemur út nú í ár í 72. sinn og í ár er líkaminn þema dagsins. Tatjana Latinovic formaður Kvenréttindafélagsins kemur til okkar á eftir og segir okkur frá félaginu, deginum og ýmsu fleiru sem tengist kvennabaráttu.
Við ætlum að fjalla um Klassíkina okkar síðan í þættinum en Guðni Tómasson annar umsjónarmannanna kemur til okkar. Klassíkin okkar er árlegir tónleikar Sinfóníuhljómsveitar Íslands sem marka upphafið að nýjum menningarvetri og sem fyrr fær þjóðin að hlutast til um efnisskrána. Veislan fer fram 1. september næstkomandi og verður í beinni útsendingu á RÚV.
En við byrjum á þessu, í dag verða haldin friðsamleg og þögul setumótmæli við bát Hvals hf. í Reykjavíkurhöfn. Valgerður Árnadóttir er formaður Samtaka grænkera og einn skipuleggjandi þessara mótmæla og hún er á línunni.