Skýrsla Fjármálaeftirlits Seðlabanka Íslands um sátt við Íslandsbanka var birt í morgun og þar kemur fram að Íslandsbanki fór ekki að lögum við söluna á 22,5 prósenta hlut í bankanum í mars 2022. Bankinn er sagður hafa villt um fyrir Bankasýslunni. Talið er að brotin séu alvarleg og kerfislæg, ekki tilfallandi. Bankinn greiðir 1,2 milljarða króna í sekt, þá hæstu í sögunni og forsætisráðherra segir skýrsluna áfellisdóm. Fundur stjórnar Bankasýslu ríkisins um söluna á hlut í Íslandsbanka hófst klukkan svo 15:00. Heimildin hefur eins og aðrir miðlar fjallað ítarlega um þetta mál í dag og Helgi Seljan blaðamaður á Heimildinni kemur til okkar á eftir og rýnir í skýrsluna með okkur.
Anna Margrét Áslaugardóttir formaður Dýrfinnu kemur til okkar á eftir en haft hefur verið eftir henni að neyðin hjá gæludýrum á Íslandi sé mikil, fjöldi dýra séu í athvörfum og hvetur hún fólk til að taka að sér fullorðin gæludýr í stað þess að fá sér hvolp eða kettling. Anna Margrét ræðir þessi mál við okkur á eftir en auk þess ætlum við að fræðast um Dýrfinnu sem eru félagasamtök sem hjálpar týndum gæludýrum og eigendum þeirra en auk þess eru þau að þróa smáforrit þessu tengt, meira um það hér á eftir.
Stjórn SORPU hefur falið framkvæmdastjóra að ganga til samninga við Stena Recycling AB um móttöku á brennanlegum úrgangi frá höfuðborgarsvæðinu til brennslu í Svíþjóð. Stefnt er að því að hefja útflutning á brennanlegum úrgangi á haustmánuðum og er áætlað að flytja 43 þúsund tonn af úrgangi úr landi til brennslu. Gunnar Dofri Ólafsson samskipta- og viðskiptaþróunarstjóri Sorpu kemur til okkar á eftir og segir okkur betur frá þessu.
Blær Örn Ásgeirsson er fyrsti íslenski atvinnumaðurinn í frisbígolfi. Blær er þessa stundina í keppnisferðalagi um evrópu og er staddur í Svíþjóð. Við ætlum að heyra í honum á eftir og kanna hvernig gengur.
Hafdís Sigurðardóttir úr Hjólfreiðafélagi Akureyrar vann um helgina Íslandsmeistaratitil í götuhjólreiðum. Íslandsmótið fór fram á Þingvöllum og hjóluð var 118 km leið í kvennaflokki. Þetta er ekki í fyrsti Íslandsmeistaratitill Hafdísar en meira um það hér á eftir þegar við hringjum norður og spjöllum við þessa afreks íþróttakonu.
En við byrjum á Snæfellsnesinu nánar tiltekið á Grundarfirði sem iðaði af lífi í gær en þá varpaði skemmtiferðaskipið Nieuw Statendam akkerum á ytri höfninni í Grundarfirði með 2700 manns innanborðs og á línunni hjá okkur er Björg Ágústsdóttir bæjarstjóri Grundarfjarðar.
