Áhöfn Síðdegisútvarpsins í dag skipa þeir Felix Bergsson og Kristján Freyr, auk þess sem Jóhann Alfreð verður á Hljóðvegi 1 og sendir okkur skeyti frá Skaganum.
Knattspyrnustjarnan Dele Alli hefur átt erfitt undanfarin ár og gengið illa á knattspyrnuvellinum. Í gær birtist viðtal við Dele en það hefur vakið gríðarlega athygli. Hann segir þar Gary Neville frá lífi sínu og áföllunum sem hann varð fyrir sem barn. Hann var misnotaður kornungur, seldi eiturlyf og var um 12 ára aldur settur í fóstur.
Í kjölfarið fórum við að velta fyrir okkur andlegum erfiðleikum knattspyrnufólks og hvernig íþróttahreyfing nútímans tekur á þessum vandamálum. Doktor Hafrún Kristjánsdóttir íþróttasálfræðingur hjá Háskólanum í Reykjavík kemur til okkar
Við höfum haft þann háttinn á síðustu föstudaga í Síðdegisútvarpinu að heimsækja Hljóðveg 1 svona til þess að setja okkur í stellingar fyrir helgina. Hann Jóhann Alfreð er einmitt staddur á Hljóðvegi 1 og verður mögulega, ef allt gengur upp, mættur í kaffi til Guðríðar Haraldsdóttur á Akranesi og hitt þar fyrir Ingibjörgu Halldórsdóttur, stjórnanda heimildamyndhátíðarinnar Ice Docs þegar við heyrum í honum hér á eftir.
Bannað verður með öllu að hafa í fórum sínum flugelda í Frakklandi um helgina, þegar Frakkar halda upp á Bastilludaginn, þjóðhátíðardag sinn sem er í dag. Ástæðan er áhyggjur stjórnvalda af því að óeirðir blossi upp aftur eftir að lögreglan skaut 17 ára pilt til bana á dögunum. Júlía Margrét sérlegur fréttaritari Síðdegisútvarpsins er stödd í París á Bastilludegi og við heyrum í henni rétt upp úr klukkan fimm.
Uppistandarinn Jakob Birgisson hefur síðustu misseri skemmt fólki með sýningunni Skóla lífsins í Þjóðleikhúsinu hér syðra en hefur þó einnig lagt land undir fót endrum og eins og skemmt víðs vegar um landið. Meistari Jakob er einmitt staddur á Siglufirði þessa stundina og ætlar hann taka púlsinn á sumarstemningunni við Tröllaskaga.
Stjórn stéttarfélags leikara í Hollywood, SAG, ákvað í gær að leggja niður störf á miðnætti og í kjölfarið fóru um 160 þúsund leikarar í verkfall. Félagið vill að laun leikara verði hækkuð, vinnuaðstæður bættar og tryggt að gervigreind komi ekki í stað leikara. Þetta er í fyrsta sinn í um sextíu ár sem fleiri en ein stétt í Hollywood leggur niður störf þar sem handritshöfundar hafa verið í verkfalli undanfarnar vikur. Meðan á verkfallinu stendur mega skærustu stjörnur Hollywood t.d. ekki taka þátt í að kynna kvikmyndir og sjónvarpsþætti. Af því leiðir að leikarar mega ekki taka þátt í verðlaunahátíðum og í fréttum í dag var sagt frá því
