Heilbrigðisráðherra hefur lagt fram frumvarp um tæknifrjóvgun sem heimilar notkun kynfrumna eftir andlát, skilnað eða sambúðarslit gegn skriflegu og vottuðu samþykki. Hildur Sverrisdóttir þingmaður Sjálfstæðisflokksins skrifaði langa færslu á fésbókarsíðu sína í dag þar sem að hún fagnar því skrefi sem þar er stigið en í færslunni beinir hún sjónum að afskaplega vondri og gamaldags reglu sem hún á satt best að segja erfitt með að trúa að hafi ratað inn í annars ágætt frumvarp. Við spyrjum Hildi út í kosti og galla frumvarpsins á eftir.
Ólafur Egilsson tók að sér í gærkvöld embætti formanns Félags Leikstjóra á Íslandi. Ólafur ætlar að kíkja til okkar í Síðdegisútvarpið á eftir og við spyrjum hann út í formannsembættið.
Til að draga úr þeim neikvæðu umhverfisáhrifum sem raftæki hafa er mikilvægt að hagsmunaaðilar ræði saman og finni lausnir. Saman gegn sóun, Sorpa, Úrvinnslusjóður og Tækniskólinn bjóða öllum sem starfa við og/eða hafa áhuga á hönnun, sölu, notkun og endurvinnslu raftækja til fundar í Góða hirðinum á morgun. Birgitta Steingríms og Þorbjörg Sandra frá Umhverfisstofnun koma í þáttinn og segja okkur betur frá þessu.
Það er fólki eflaust ferskt í minni þegar bíl var ekið inn í bakarí Snorra Stefánssonar á Sauðakróki, Sauðárkróksbakarí. Þetta var ekki bara áfall fyrir Snorra sjálfan heldur líka íbúa bæjarins. Eigandi Hard Wok ákvað að legga sitt af mörkum í gær og styðja við bakið á bakaranum með því að selja hamborgara og rann salan á þeim beint í söfnun til að koma bakaríinu á laggirnar sem fyrst. Hrafnhildur Viðarsdóttir eigandi naglasnyrtistofunnar Game Of Nails lét ekki sitt eftir liggja og er hún líka búin að vera að safna fyrir bakarann. Við heyrum í henni á eftir.
Íslensku menntaverðlaunin verða veitt að Bessastöðum í nóvember og þó svo að okkur finnist kannski of snemmt að huga að einhverju sem mun eiga sér stað í nóvember þá ætlum við aðeins að beina sjónum okkar að þessum verðlaunum í dag en skilafrestur á tillögum til tilnefninga er til 1. júní sem rennur brátt upp. Gerður Kristný rithöfundur veit miklu meira um þessi verðlaun og hún verður gestur okkar á eftir.
En við byrjum á þessu. Það hefur blásið hressilega á landinu í dag og eru gular viðvaranir víða. Elín Björk Jónasdóttir veðurfræðingur er á línunni og við tökum stöðuna á landinu öllu.
