Það eru þau Júlía Margrét og Kristján Freyr sem halda utan um stýrið í Síðdegisútvarpinu í dag.
Við ætlum okkur að húkka far hjá Jóhanni Alfreð Kristinssyni sem hefur verið að svífa um á Hljóðvegi 1 síðustu misseri og er nú staddur á Vesturlandi. Mögulega á miðjum Breiðafirði ef allt hefur gengið að óskum.
Og þá næst að kattavaktinni. Auðna Hjarðar hefur verið stödd í Búdapest síðustu ár þar sem hún var við nám. Nú er komið að því að flytja aftur heim en það getur hún ekki hugsað sér að gera án vinar síns. Fyrir tveimur árum var kettinum Fehér, sem er Hvítur á ungversku, bjargað af götunni. Þegar hann fannst var hann illa farinn, þakinn flóm og mítlum en Auðna sá til þess að hann fengi þá meðhöndlun sem þurfti. Hún reyndi að finna nýtt heimili fyrir Fehér en enginn vildi taka hann að sér. Hún getur ekki hugsað sér að láta lóga honum svo Auðna hefur hrint af stað söfnun fyrir kisa. Við heyrum í Auðnu.
Hin árlega Drusluganga verður gengin á laugardaginn í Reykjavík og á Sauðárkróki. Viku síðar verður einnig gengið á Borgarfirði eystra. Með göngunni sýna þátttakendur samstöðu með þolendum kynferðisofbeldis og mótmæla kerfislægu misrétti. Lísa Margrét Gunnarsdóttir er í skipulagsteymi Druslugöngunnar kíkir við og segir okkur frá.
Margir landsmenn hafa risið árla úr rekkju síðustu daga til að fylgjast með fótbolta því HM kvenna fer nú fram og að þessu sinni í Ástralíu og á Nýja Sjálandi. Íslensku stelpurnar eru því miður ekki með að þessu sinni, en það má samt alveg segja að við eigum fulltrúa á mótinu. Hin nýsjálenska Betsy Hasset sem leikur fyrir land sitt á mótinu hefur leikið með KR og Stjörnunni hér á landi og hana mætti kalla tengdadóttur Íslands. Hennar heittelskaði, Guðmundur Snær Guðmundsson var ekki staddur á Nýja Sjálandi að fylgjast með sinni konu og hennar liði vinna sinn fyrsta leik gegn Noregi en hann fylgdist með á skjánum. Hann mætir til okkar.
Söngkonan Kristjana Stefánsdóttir er sérstakur föstudagsgestur Síðdegisútvarpsins að þessu sinni. Kristjana stóð í ströngu með vorinu þar sem hún þjálfaði upp komandi söngstjörnur bæði í Idol-keppninni hér heima og Söngvakeppni sjónvarpsins og nú í sumar hefur hún staðið djassvaktina auk þess að bresta með dægilegum dúettum víða um land. Við spjöllum við Kristjönu um sumarið og tímann.
