Ísland hefur legið undir miklum netárásum í dag. Vefur Alþingis lá niðri um tíma og net- og símalaust var í þinghúsinu. Vefur Stjórnarráðsins var einnig óvirkur um tíma, sem og fleiri vefir opinberra stofnanna. Tölvuárásarhópurinn NoName057, sem er hliðhollur Rússum, lýsti netárásum á íslensk stjórnvöld á hendur sér. Við heyrum í Guðmundi Arnari Sigmundssyni, forstöðumanni Cert - is, sem gegnir hlutverki landsbundins öryggis- og viðbragðsteymis vegna ógna, atvika og áhættu er varðar net- og upplýsingaöryggi þjóðarinnar.
Það hefur verið nóg að gera undanfarinn sólahring hjá Sigrúnu Björk Jakobsdóttur, framkvæmdastjóra flugvallasviðs Isavia. Aldrei hafa jafn margar einkaþottur komið til landsins á jafn stuttum tíma og við ætlum að spyrjast fyrir um hvernig hefur gengið að taka á móti öllum þessum vélum og svo að koma þeim fyrir.
Nýjar ruslatunnur eru í dreifingu á höfuðborgarsvæðinu en við breytinguna bætist ein tunna við í einbýli þar sem eru fleiri en þrír íbúar. Ekki eru allir sáttir með það og segir samskiptastjóri Sorpu að dæmi séu um að íbúar hafi hindrað sorphirðumenn frá því að vinna vinnuna sína vegna nýju tunnunnar. Gunnar Dofri Ólafsson, samskiptastjóri Sorpu kemur til okkar og segir frá.
Það er þriðjudagur í dag og Gígja Hólmgeirsdóttir verður með okkur að norðan. Og hún ætlar að fjalla um nokkuð sem margir kannast við, bæði þau sem eiga heima á Akureyri og þau sem hafa komið þangað sem gestir, og það er hversu erfitt það getur verið að labba upp Gilið. Og nú er meira að segja búið að gera lag, lagið heitir "'Ég nenni ekki að labba upp Gilið" með hljómsveitinni Brenndu bönununum. Gígja mælti sér mót við meðlimi hljómsveitarinnar, þær Heklu Sólveigu Magnúsdóttur og Sigrúnu Freygerði Finnsdóttur, og fékk að heyra allt um þetta nýja lag.
Andrés Önd skipar stóran sess í hjörtum allmargra landsmanna. Mörg okkar lærðu að lesa með Andrésarblað í höndunum og það á enn vel við. Í dag eru 40 ár síðan fyrsta Andrésar Andar blaðið kom út á íslensku. Við fáum til okkar einn heitasta Andrésar Andar aðdáanda landsins, hana Sigríði Theodóru Eiríksdóttur.
En við byrjum í Hörpu þar sem fundur Evrópuráðsins er í fullum gangi og miðað við dagskrá eru þáttakendur að skila sér í hús og bráðum verður hópmyndataka - Sveinn H. Guðmarsson fjölmiðlafulltrúi utanríkisráðuneytisins verður á línunni hjá okkur.
