Peningastefnunefnd Seðlabankans ákvað að hækka stýrivexti um 1,25 prósentustig í morgun. Stýrivextir eru 8,75% eftir breytinguna. Verðbólguspá bankans er svört. Margir tjáðu sig á samfélagsmiðlum í morgun þegar tilkynnt var um hækkunina og má þar nefna stjórnmálafólk og fólk úr verkalýðshreyfingunn en nú ætlum við að opna fyrir símann og heyra í fólkinu í landinu og heyra hvað hlustendur okkar hafa að segja.
Á morgun verður mikil hátíð í Sjávarklasanum úti á granda þegar að yfir fimmtíu frumkvöðlar og fyrirtæki með kollagen úr fiski, veiðar með ljósum, síldarlýsi, sárameðferð með fiskroði, veiðitækni, rafmagnsbáta, fiskleður, fiskisnakk, fiskidrykki, snyrtivörur úr skel svo eitthvað sé nefnt verða með á sýningu á haftengdri nýsköpun. Við ætlum að fræðast meira um það sem þarna verður í boði þegar Þór Sigfússon stofnandi Sjávarklasans kemur til okkar á eftir.
Við heyrðum svo skemmtileg sögu af tilurð nýjustu bókar Gunnars Helgasonar, bókin heitir Bella gella krossari og kemur í verslanir í dag eða morgun. Við stóðumst ekki freistinguna og hringdum í Gunna og báðum hann að kíkja til okkar strax eftir fimm fréttir í dag til að segja okkur þessa sögu í beinni.
Nú leita AFS samtökin að fósturfjölskyldum fyrir skiptinema sem eru að koma hingað til lands í haust. Hvaða skilyrði þurfa fósturfjölskyldur að uppfylla og hvað felst í því að taka að sér skiptinema. Kristín Björnsdóttir sem stýrir fósturfjölskylduöflun hjá AFS og Katalín Karácsoní sem kom hingað sem skiptinemi árið 2016 frá Ungverjalandi koma til okkar og segja okkur betur frá.
Um þessar mundir hefur Tjarnarbíói verið breytt í baðlón, ástæðan er sú að verkið Lónið er þar í sýningu og er það fyrsta sviðsverk Magnúsar Thorlacius sem útskrifaðist frá LHÍ nýlega, við hringjum í Magnús síðar í þættinum.
Við fengum fréttir af því fyrr í dag að Snorri Steinn Guðjónsson verði næsti landsliðsþjálfari Íslands í handbolta karla. Það að búið sé að ráða landsliðsþjálfara hljóta að teljast góð tíðindi hingað er kominn Einar Örn Jónsson íþróttafréttamaður.
