Síðdegisútvarpið

16.september

Reiknað er með að vatnsrennibraut verði komin upp í Dalslaug í Úlfarsárdal næsta vor. Ekki stóð til að hafa rennibraut í sundlauginni en íbúar á svæðinu fóru fram á það við borgaryfirvöld og unnu sigur í málinu. Björn Ingi Björnsson í íbúaráði Grafarholts og Úlfarsárdals verður á línunni.

Sigrún Steinarsdóttir heldur úti mataraðstoð á Akureyri í sjálfboðavinnu. Sjaldan hefur ástandið verið verra að hennar sögn en hún segir fjölda fólks þurfa matargjafir og fjárhagsaðstoð um þessar mundir. Beiðnir um aðstoð hafi borist frá fjölda staða á landinu, vandinn sé því ekki einskorðaður við Akureyri og nágrenni.

Eftir að Karl Bretaprins varð Karl konungur hefur internetið hæðst viðstöðulaust að honum. Hvort sem það eru vandræði hans með penna eða þrútnir fingur hans. En hvernig á honum að takast að vinna hug og hjörtu heimsbyggðarinnar eins og móðir hans? Grétar Theódórsson almannatengill leggur Karli línurnar.

Rapparinn Emmsjé Gauti er alltaf með mörg járn í eldinum. Hann er auðvitað alltaf að gefa út tónlist en skipuleggur líka jólatónleika ásamt því að vera með puttana í hinu og þessu. Gauti kemur til okkar í föstudagsspjallið og segir okkur hvað er að frétta.

Íslenska stefnumótaappið Smitten lauk 1,4 milljarða króna fjármögnun á dögunum. Smitten nýtur mikilla vinsælda á Íslandi og víðar og til okkar eru komnar Unnur Aldís Kristinsdóttir markaðsstjóri og Gabríela Jóna Ólafsdóttir aðstoðarmaður framkvæmdastjóra til að ræða þessi tíðindi og segja okkur betur frá heimi stefnumótaappanna.

Míu verðlaunin voru afhent í gær við hátíðlega athöfn. Að þessu sinni var það Tryggvi Helgason barnalæknir sem hlaut verðlauninn. En hvað þarf maður að gera til þess að hljóta þessi verðlaun, Þórunn Eva G. Pálsdóttir stofnandi Mia Magic sem er góðgerðarfélag sem stendur á bakvið Miu verðlaunin ætlar að koma til okkar á eftir og fræða okkur um félagið, verðlaunin og verðlaunahafann.

Umsjónarmenn þáttarins eru Atli Fannar Bjarkason og Guðrún Dís Emilsdóttir

Frumflutt

16. sept. 2022

Aðgengilegt til

16. sept. 2023

Þau Andri Freyr Viðarsson, Guðrún Dís Emilsdóttir og Hrafnhildur Halldórsdóttir halda landanum vel upplýstum um menn og málefni á leið úr vinnu á daginn. Þau fylgjast vel með fréttum og dægurmálum og spila nóg af góðri tónlist.