• 00:08:40Aldís Þorbjörg - kynlífsráðgjöf
  • 00:24:43Kjartan rakari á Selfossi
  • 00:36:48Hrönn Vilhelmsdóttir - Hlöðueldhúsið

Mannlegi þátturinn

Kynlífsráðgjöf, Kjartan rakari og Hlöðueldhúsið

Það er dálitið merkilegt, miðað við hvað kynlíf er stór partur af lífi okkar, hversu fáir í rauninni tala opið um kynlífið sitt. Þá erum við ekki að tala um að tala opinberlega um það, eða við hvern sem er, heldur bara við maka sinn, eða þann, eða þá, sem viðkomandi stundar kynlíf sitt með. Þar sem það er oftar en ekki feimnismál að ræða það, þrátt fyrir að vandamál í kynlífinu geti verið mjög stórt vandamál í samböndum. Aldís Þorbjörg Ólafsdóttir sálfræðingur var að ljúka námi í kynlífsráðgjöf frá Michigan-háskóla í Bandaríkjunum. Hún er því farin að taka við málum sem kynlífsráðgjafi, bæði fyrir einstaklinga og pör. Við fengum Aldísi í þáttinn og fræddumst um kynlífsráðgjöf hjá henni.

Það voru margir orðnir hriklega lubbalegir þegar hágreiðslustofur máttu opna aftur eftir COVID19 bannið og enn bíða margir eftir að þeirra tími renni upp. Á Rakarastofu Björns og Kjartans á Selfossi hafa Sunnlendingar getað fengið klippingu í rúm 70 ár eða allt frá því að Gísli Sigurðsson rakari ákvað að yfirgefa sollinn í Reykjavík og flytja til Selfoss. Björn sonur hans fetaði í fótsporin og því næst tveir synir hans, þeir Kjartan og Björn Daði. Við heimsóttum þetta vinsæla ættarveldi gær og fengum innsýn í dag í lífi rakarans.

Hjónin Hrönn Vilhelmsdóttir og Þórólfur Antonsson stofnuðu kaffihúsið Kaffi Loka á Skólavörðustígnum fyrir rúmum áratug. Ekki alls fyrir löngu ákváðu þau að nú væri komið nóg og seldu kaffihúsið. Þau sáu fyrir sér rólega daga en stundum fer lífið í allt aðra átt en nokkurn getur órað fyrir. Þau er komin á bólakaf í nýtt ævintýri, núna í Þykkvabænum og innan skamms opna þau nýtt og frumlegt ferðaþjónustufyrirtæki sem mun heita Hlöðueldhúsið. Við fórum og tókum stöðuna á þeim fyrir þáttinn í dag.

UMSJÓN MARGRÉT BLÖNDAL OG GUNNAR HANSSON

Birt

14. maí 2020

Aðgengilegt til

14. maí 2021
Mannlegi þátturinn

Mannlegi þátturinn

Um litróf mannlífsins.

Umsjón: Guðrún Gunnarsdóttir og Gunnar Hansson.

Þættir