Hættusvæði stækkað við Grindavík og viðskiptaráðherra brýnir bankana
21. nóvember 2023
Veðurstofan hefur uppfært hættumatskort af Grindavík á grundvelli nýrra gervitunglamynda og stækkað hættusvæðið umhverfis bæinn. Jarðskjálftavirkni gæti aukist næstu daga.
Menningar- og viðskiptaráðherra segir að ef fjármálastofnanir grípi ekki til aðgerða vegna Grindvíkinga á allra næstu dögum þurfi stjórnvöld að grípa inní og útilokar ekki að það inngrip gæti verið býsna hressilegt.
HS Veitur byrjuðu í dag að bora fyrir varavatnsbóli fyrir Reykjanesbæ og Suðurnesjabæ. Það nýtist 25 þúsund íbúum og fyrirtækjum og getur verið tilbúið eftir tvær til þrjár vikur.
Bandaríkjaforseti er vongóður um að senn semjist um að gíslar Hamas samtakanna á Gaza verði látnir lausir.
Bæjarstjóri Vestmannaeyja segir skipta öllu máli að neysluvatnslögnin til Eyja sem skemmdist á föstudag verði löguð sem fyrst. Almannavarnanefnd Vestmannaeyja fundar um næstu skref.
Hópur meðlima í 'Ndrangheta (dran-GETA) -mafíunni hlaut dóm í dag í stærstu mafíuréttarhöldum allra tíma. Fangelsisdómarnir yfir þeim sakfelldu eru samtals um 2.200 ár.
Umsjón: Anna Kristín Jónsdóttir. Tæknimaður: Mark Eldred. Stjórn útsendingar Annalísa Hermannsdóttir.