1. nóvember 2023
Fylgi stjórnmálaflokkanna stendur í stað á milli mánaða samkvæmt nýjum Þjóðarpúlsi Gallup og breytingar í ríkisstjórn virðast hafa lítil áhrif. Samfylkingin er langstærsti flokkurinn með 29% fylgi. Urður Örlygsdóttir sagði frá.
Sjötíu og sex Palestínumenn voru fluttir í dag frá Gazasvæðinu á sjúkrahús í Egyptalandi. Þúsundir til viðbótar þurfa á bráðri hjálp að halda.
Nýjar mælingar sýna merki um kvikuinnskot á fjögurra kílómetra dýpi norðvestan við Þorbjörn á Reykjanesskaga. Vísindamenn búast við að jarðskjálftavirkni haldi áfram næstu daga. Helga Árnadóttir framkvæmdastjóri Bláa lónsins segir starfsemnn í viðbragðsstöðu en ekki þurfi að loka lóninu að svo stöddu. Höskuldur Kári Schram ræddi við hana.
Bæta á öryggi gangandi og hjólandi við Ásvelli í Hafnarfirði þar sem banaslys varð í vikunni. Sævar Guðmundsson, aðalvarðstjóri lögreglunnar í Hafnarfirði segir að meðal annars eigi að færa göngu- og hjólastíg til að bregðast við slysinu. Ásta Hlín Magnúsdóttir ræddi við hann.
Breyta á lögreglulögum til að auka valdheimildir lögreglu til afbrotavarna. Ekki náðist að ljúka málinu á síðasta þingi en Guðrún Hafsteinsdóttir dómsmálaráðherra telur samstöðu um það nú. Arndís Anna Kristínardóttir Gunnarsdóttir þingmaður Pírata segir enn skorta á eftirlitsþáttinn. Jóhanna Vigdís Hjaltadóttir talaði við þær.
Lögreglumönnum hefur fjölgað í takt við fólksfjölgun hér á landi síðustu tíu árin samkvæmt tölum dómsmálaráðuneytisins en Fjölnir Sæmundsson, formaður Landssambands lögreglumanna segir tölurnar ekki segja alla söguna.
Umsjón: Anna Kristín Jónsdóttir. Tæknimaður: Mark Eldred. Stjórn útsendingar Annalísa Hermannsdóttir
