Undanfarið hafa komið upp alvarleg mál þar sem gæludýr hafa orðið fyrir frostlögseitrun eftir að hafa étið mat sem þau fundu utandyra í sumarbústaðahverfinu Hvammi eða Hvammsvík í Kjós. Grunur leikur á að um ásetningsverk geti verið að ræða. Við ræddum þetta sorglega ál við Helgu Hjartardóttur, dýralækni hjá Animalíu
Oddvitar flokkanna sem bjóða fram í Hafnarfirði mætast í sjónvarpinu á Rúv í kvöld. Í tilefni af því skellum við okkur í Hafnarfjörð. Við byrjuðum niðrá höfn þar sem við ræddum við Inga Rafn Ragnarsson hafnsögumann. Því næst skellum við okkur á kaffibarinn Barböru þar sem við hittum rekstrarstjórann Ólöfu Birnu Bjarnadóttur og svo lukum við heimsókninni í Firðinum þar sem við tókum nokkra Hafnfirðinga tali.
Annan hvern þriðjudag heyrum í Jóhanni Hlíðar Harðarsyni á Spáni en í Spánarspjallinu nú sagði hann okkur okkur af bókaútgáfu á Spáni, 14 ára gagnfræðingi sem fær ekki að fara til Bandaríkjanna á Allsherjarþing SÞ í New York og þá sagði hann okkur litla sögu frá Úganda en þar hefur geisað borgarstríð í 30 ár.
Sumardagurinn fyrsti í ár verður tileinkaður náttúru Íslands hjá Landvernd. Þá á að ganga fyrir náttúruna og framtíðina og í framhaldi af því verður pallborð í norræna húsinu með oddvitum stjórnmálaflokka í sveitarstjórnarkosningum. Til þess að segja okkur meira kom til okkar Ragnhildur Katla Jónsdóttir upplýsingafulltrúi Landverndar.
Stígur Helgason kíkti til okkar. Hann heldur utan um kosningaumfjöllunina hér á Rúv, sem fer af stað í kvöld. Við fengum hann til að segja okkur hvernig fyrirkomulagið á henni verður næstu vikurnar.
Sjávardjásn er nýsköpunarverkefni sem byggir á sjálfbærni og skapandi endurnýtingu. Frumkvöðlahópur í Menntaskólanum við Sund fékk hugmyndina þegar þau fóru að velta fyrir sér hvað verður um fiskikróka eftir að þeir hætta að nýtast í veiðum. Í stað þess að enda sem úrgangur nýtum þau þá á nýjan og verðmætan hátt með því að umbreyta þeim í handgerða, einstaka eyrnalokka. Þær Kamilla Mía Briem og Halldóra Mjöll Snorradóttir komu til okkar og sögðu frá.
