Um næstu helgi verður nýtt íslenskt barnaleikrit, Hollvættir á heiði eftir Þór Tulinius, leikara og leikstjóra, frumsýnt í Menningarmiðstöðinni Sláturhúsinu á Egilsstöðum, en um er að ræða atvinnu leikhússýningu með öllu tilheyrandi. Verkefnið er með þeim stærri sem Sláturhúsið hefur tekið þátt í og við slógum á þráðinn austur og heyrðum í Ragnhildi Ásvaldsdóttur forstöðumanni sem segir okkur meira.
Íslenska kvennalandsliðið í knattspyrnu mætir Þjóðverjum á Laugardalsvelli í Þjóðadeild kvenna í kvöld. Sveindís Jane Jónsdóttir verður því miður ekki með að þessu sinni, en hún hefur glímt við meiðsli undanfarnar vikur. Sveindís Jane hefur þó ekki setið auðum höndum og geysist nú fram á ritvöllinn með nýja bók þar sem saga hennar er rakin. Í tilefni af útkomu bókarinnar skaust Sveindís Jane hingað heim og við heyrðum í henni ásamt útgefanda hennar Sæmundi Norðfjörð og ræddum fótboltann, lífið og nýju bókina.
Sigmundur Davíð Gunnlaugsson talaði um breytingu á skattlagningu matvæla á landsfundi Miðflokksins um helgina og sagðist þar telja að það væri komið tilefni til að leggja af virðisaukaskatt á matvæli, í tvö ár hið minnsta. Þannig mætti strax hafa áhrif á lífskjör og verðbólguna, og þannig vaxtastig líka. Við ræddum þessa hugmynd betur við Þórólf Matthíasson, prófessor í hagfræði við Háskóla Íslands, og spurðum hvort verðbólgan minnki við að lækka eða afnema virðisaukaskattinn og hvort almenn velferð aukist almennt við slíkar aðgerðir.
Það fer líklega ekki fram hjá mörgum að í dag er Hrekkjavaka, hátíð sem hefur á síðustu árum haldið innreið sína á Íslandi, en á sér þó lengri sögu hér á landi en mörg gera sér grein fyrir. Við töluðum um hrekkjavökuna við Terry Gunnell, prófessor í þjóðfræði við Háskóla Íslands.
Við horfðum svo til himins í lok þáttar með Sævari Helga Bragasyni, okkar helsta sérfræðingi í himingeimnum, og að þessu sinni var tunglið í brennidepli.
Tónlist:
Julian Civilian - Fyrirmyndarborgari.
Sébastien Tellier - Divine.
Bee Gees - Jive Talkin'
Helena Eyjólfsdóttir - Reykur.
Júníus Meyvant - Rise up.
Björk - Army of me.
Ed Sheeran - American Town.
Vök - Illuminating.
Stefán Hilmarsson og Possibillies - Tunglið mitt.
