Undir lok síðustu viku undirritaði Pútín Rússlandsforseti lög sem afturkalla staðfestingu Rússlands á sáttmálanum um algjört bann við tilraunum með kjarnorkuvopn (CTBT). Hvað þýðir þetta skref Rússa, ef eitthvað og er hægt að merkja einhverjar áherslubreytingar í taktík Pútín nú þegar athygli heimsins hefur horfið frá honum um stund? Jón Ólafsson prófessor við Háskóla Íslands verður á línunni.
Ólafur Margeirsson, doktor í hagfræði, skrifaði um það um helgina að síðan í lok árs 2021 hafi eignir lífeyrissjóða minnkað um cirka 800 milljarða að raunvirði, og nefndi aukið vægi erlendra hlutabréfa í eignasöfnum sjóðanna og verðfall þeirra og hærra vaxtastig á Íslandi sem ástæður þess. Við ræðum um það við hann og möguleikann á að lífeyrissjóðir bæti áhættudreifingu eignasafnsins með því að eiga íbúðir og leigja þær út.
Stefán Ólafsson, prófessor emeritus við Háskóla Íslands og sérfræðingur hjá Eflingu, skrifaði á dögunum grein um norræn lífskjör og sagði þar basl almennt algengara og meira hér á landi en á hinum Norðurlöndunum. Við ræðum við Stefán um laun, fjárhagserfiðleika og virkni velferðarkerfisins hér á landi og í þeim löndum sem við berum okkur oft saman við.
Er kominn tími til að slökkva á Friðarsúlu Yoko Ono? Lóa Björk Björnsdóttir menningarrýnir sagði í nýlegri bloggfærslu sem vakti athygli að Friðarsúlan væri listaverk sem ljósmengar himininn yfir háveturinn og svartasta myrkrið og minnir okkur á að við erum ekki friðarþjóð en erum til í að taka þátt í trendy leikþætti um það. Guðmundur Oddur Magnússon- listamaður og prófessor kemur til okkar.
Mjög hefur dregið úr guðstrú Íslendinga síðustu áratugi, samkvæmt niðurstöðum nýrrar könnunar sem kynnt var á Þjóðarspegli Háskóla Íslands um helgina. Fyrir sautján árum sögðu 45 prósent að til væri kærleiksríkur guð sem hægt væri að biðla til, en nú er að hlutfall komið niður í 25 prósent. Við ræðum við séra Davíð Þór Jónsson, sóknarprest í Laugarneskirkju, í lok þáttar.
Lagalisti:
MUGISON - É Dúdda Mía.
SPANDAU BALLET - To cut a long story short.
KINGS OF CONVENIENCE - Rocky Trail.
ROSA LINN - SNAP.
PAUL SIMON - 50 Ways To Leave Your Lover.
Una Torfadóttir, Elín Hall - Bankastræti.
Laufey, Philharmonia Orchestra - California and Me.
GUS GUS - Ladyshave.
PHIL COLLINS & PHILIP BAILY - Easy Lover.
KK BAND - Álfablokkin.
