Lovísa Ólafsdóttir sérfræðingur í forvörnum hjá VÍS kom til okkar og ræddi forvarnir og vinnuslys, en að minnsta kosti 16 manns slasa sig í vinnunni á degi hverjum hér á landi samkvæmt tölum frá embætti landlæknis. Það á ekki að geta gerst að fólk fari í vinnuna og komi ekki aftur segir Lovísa í nýlegri grein.
Erlingur Erlingsson, hernaðarsagnfræðingur og sjálfstætt starfandi sérfræðingur í alþjóða- og öryggismálum, var á línunni frá Lundúnum. Við ræddum umræðu um að Eystrasaltsríkin búi sig nú undir innrás Rússa.
Eftir því sem þátttaka innflytjenda á íslenskum vinnumarkaði eykst verður þörfin á markvissri íslenskukennslu sífellt meiri. Alþýðusamband Íslands í samstarfi við Mími símenntun stendur fyrir ráðstefnu um þessi mál á fimmtudaginn kemur og þar verður einblínt á helstu áskoranir samfélagsins þegar kemur að inngildingu innflytjenda og því að kenna/læra nýtt tungumál í nýju landi. Vanessa Monika Isenmann, verkefnastjóri hjá Mími kíkti til okkar og sagði okkur meira.
Í gærkvöldi voru viðvörunarflautur í Grindavík og Bláa lóninu prófaðar, en talið er að eldgos gæti hafist í vikunni með litlum fyrirvara. Við töluðum við Friðrik Einarsson, framkvæmdastjóra Northern Light Inn hótelsins við Bláa lónið, um ráðstafanir, mögulega rýmingu og áhrif þess sem hefur verið að gerast á Reykjanesskaga á bókanir.
Við ræddum mannanafnafrumvarp Guðbrands Einarssonar, þingmanns Viðreisnar, sem miðar meðal annars að því að mannanöfn takmarki ekki persónufrelsi fólks. Í umsögn Þjóðskrár sem birt var í gær er gagnrýnt að einstaklingum verði heimilt að skipta oft um nafn og bent á að ekki gangi að óbreyttu að leggja niður ákvæði núgildandi laga um takmörkun á fjölda nafna þar sem stafabil í kerfi Þjóðskrár bjóði ekki upp á slíkt.
Tónlist:
Ragnheiður Gröndal - Ást.
Declan McKenna - Slipping through my fingers.
Fleetwood Mac -Hold me.
GDRN - Parísarhjól.
Baggalútur og Una Torfa - Casanova.
Oasis - Little by little.
Hipsumhaps - Fyrsta ástin.
Memfismafían, Sigurður Guðmundsson og Jón Gnarr - Mannanafnanefnd.
David Bowie - Wild is the wind.
