Margrét Marteinsdóttir og Siggi Gunnars höfðu umsjón með þættinum.
Miklar vetrarhörkur eru í fjölda ríkja Bandaríkjanna, allt frá Nýju Mexíkó í suð-vestri til ríkjanna sem tilheyra svæðinu Nýja-England í norð austri. Um milljón íbúa eru án rafmagns í suðurríkjunum, þar sem Tennesse, Missisippí, Louisiana og Texas hafa orðið verst úti.
Óveðrið hefur raskað samgöngum verulega en yfir 11.000 flugferðum var aflýst í gær. Það átti til að mynda við um allar flugferðir frá Íslandi til Bandaríkjanna. Íbúar höfuðborgarinnar, Washington DC, hafa ekki farið varhluta af óveðrinu og þar er Logi Bergmann Eiðsson búsettur. Logi og Hrafnhildur Hólm, dóttir hans voru á línunni. Hún var heima því að skólahald í borginni féll niður í dag.
Hér heima hafa hins vegar verið óvenjulega mikil hlýindi og skemmst er að minnast þess að hiti fór mest upp í 19 gráður á aðfangadag. Hlýindin hafa þó í för með sér að skíðasvæði Höfuðborgarbúa eru lokuð. Einar Bjarnason rekstrarstjóri í Bláfjöllum segir stöðuna ömurlega fyrir þau sem vilji skíða. Við hringdum í Einar og slógum síðan á þráðinn til Brynjars Helga Ásgeirssonar sem er forstöðumaður Hlíðarfjalls en þar er opið og mikið stuð.
Atvinnuleysi hefur aukist, mæltist 4,4 prósent í byrjun janúar en var 3,8 prósent á sama tíma í fyrra. Atvinnuleysi mælist vanalega mest í janúar og febrúar því þá er minna að gera í byggingariðnaði og ferðþjónustu. Við í Síðdegisútvarpinu skoðuðum í dag atvinnuauglýsingar til að sjá hvernig störf er verið að auglýsa. Á Alfreð mátti meðal margra annarra starfa sjá auglýst laust starf í vaktavinnu á bílaþvottastöð í Reykjavík, framtíðarstarf á leikskóla á Egilsstöðum. Þar var auglýst eftir vélvirkja á vinnustað í Garðabæ og lögfræðingi á sviði virðisaukaskatts.
Við sáum í fljótu bragði ekki auglýst eftir H Z á bát, hvorki á línu né net eins og í texta Bjartmars Guðlaugssonar en Anna Katrín Halldórsdóttir sagði okkur meira um stöðuna á atvinnumarkaði. Hún er öllum hnútum kunnug á starfatorginu enda framkvæmdastjóri hjá Alfreð.
Húskakkalakkinn hefur líklega náð varanlegri fótfestu á Íslandi. Hann hefur undanfarin árum fundist í Reykjavík en einnig meðal annars á Þingeyri, Siglufirði, Húsavík, Vopnafirði og Neskaupstað. Við töluðum um kakkalakka við Ólaf Inga Heiðarsson, teymisstjóra hjá Dýraþjónustu Reykjavíkur.
Siggi Gunnars fjallaði um Trine Dyrholm og tónlistina í þáttunum Danska konan.
Þjóðin hefur heldur betur farið á hliðina yfir góðu gengi strákanna okkar á Evrópumótinu í handbolta sem fer fram um þessar mundir. Í því samhengi má nefna að 67% landsmanna fylgdust með leik Íslands og Ungverja hér á RÚV í síðustu viku. Mótið er að þessu sinni haldið í Svíþjóð, Danmörku og Noregi en strákarnir okkar lönduðu einmitt fræknum sigri gegn gestgjöfunum Svíum í gær eins og flestir væntanlega vita.
En hvernig er almenn stemning fyrir handboltanum í Svíþjóð? Er þjóðin að fara á hliðina eins og við hér á Íslandi. Jón Óðinn Waage eða ÓDI eins og hann er oftast kallaður, sem búsettur er í Dagersfors í Svíþjóð var á línunni.
