Á sunnudaginn var alþjóðadagur heilablóðfallsins en um það bil 2 einstaklingar fá slag á dag hér á landi. Heilablóðfall, eða slag, er þriðja algengasta dánarorsökin í heiminum. Þórir Steingrímsson formaður Heilaheilla og Björn Logi Þórarinsson, lyf- og taugasérfræðingur á Taugadeild Landspítala, komu í þáttinn í dag og fræddu okkur frekar hvað beri að hafa í huga, orsök heilablóðfalls, stöðuna í þessum málum og hver þróunin er.
Piparfólk er heimildarleikhús (með örlitlu kómísku skáldaleyfi), þar sem áhorfendur kynnast m.a starfsmanni gasstöðvarinnar í Reykjavík (1910-1952) og leyndarmáli hans. Fyrir skömmu komst meðlimur sviðslistahópsins Díó, Aðalbjörg Árnadóttir að því að langafi hennar Guðni Eyjólfsson væri ekki allur þar sem hann var séður. Hún vissi ekki mikið um Guðna langafa sinn, ættboginn var ekki samheldinn né fjölmennur. Hún vissi þó að hann var 5 barna faðir sem vann sem kyndari í Gasstöðinni í Reykjavík og var því iðulega kallaður Guðni gas. Þegar hún komst að því að Guðni, undir dulnefninu Gylfi hefði skrifað þekktar gamanvísur ákvað hún að rannsaka málið og fann ýmislegt sem vakti frekari áhuga hennar. Þau Aðalbjörg Árnadóttir leikkona og Georg Kári Hilmarsson tónlistarmaður komu í þáttinn, en Guðni var einmitt langafi þeirra beggja.
Í veðurspjallinu með Einari Sveinbjörnssyni tjöluðum við svo um óveður sem skella mun á Bretlandseyjum og N-Frakkland á fimmtudag. Lægðin hefur fengið heitið Ciarán og er óvenju djúp miðað við þessar slóðir. Við ræddum svo einnig um blíðuna hér heima og sjólag.
Tónlistin:
Lonestar / Norah Jones (Lee Alexander)
Bye Bye love / Simon and Garfunkel (Felice og Budleox Bryant) -
Take it Easy /Eagles (Glenn Frey & Jackson Browne)
Jarðarfarardagur / Savanna tríóíð (Þórir Baldursson og Sigurður Þórarinsson)
UMSJÓN: GUÐRÚN GUNNARSDÓTTIR OG GUNNAR HANSSON
