Stjórnvöld kynntu í gær aðgerðir til að eyða óvissu Grindvíkinga og hjálpa þeim að koma þaki yfir höfuðið. Ljóst er að kostnaður mun hlaupa á tugum milljarða og aðgerðirnar reyna á þanþol húsnæðismarkaðarins. Ráðherrar ræddu í dag að taka húsnæðisliðinn út úr verðbólgumælingum. Þá hafa Katrín Jakobsdóttir og Bjarni Benediktsson sagt að aðgerðirnar minnki svigrúm stjórnvalda til að koma að kjarasamningum, eins og kallað er eftir. Gestir Kastljóss voru Jón Bjarki Bentsson, aðalhagfræðingur Íslandsbanka, og Katrín Ólafsdóttir, dósent í hagfræði við HR. Þau ræddu hugsanleg efnahagsleg áhrif aðgerðanna í Grindavík.

Rauði krossinn í Færeyjum hratt í síðustu viku af stað söfnun fyrir Grindvíkinga. Kastljós fór til Færeyja og hitti Jóannes Eidesgaard, formann Rauða Krossins, en hann var jafnframt lykilmaður í að veita Íslendingum neyðarlán eftir efnahagshrunið 2008.

Gamanmyndin Fullt hús verður frumsýnd í vikunni. Hún fjallar um kammersveit sem berst í bökkum en telur sig komna í feitt þegar heimsfrægur íslenskur sellóleikari gengur til liðs við hana. En ekki er allt sem sýnist. Þetta er fyrsta bíómynd Sigurjóns Kjartanssonar, oft kenndur við Tvíhöfða og Ham, en hann bæði skrifar handrit og leikstýrir. Við ræddum við hann og leikara í myndinni.